وزیر دفاع خواجہ آصف نے کہا ہے کہ نئے صوبوں کے قیام پر ریفرنڈم زیادہ دور نہیں۔ ان کے مطابق آئین میں ریفرنڈم اور ترمیم کا طریقہ کار موجود ہے اور حتمی فیصلہ اتفاق رائے سے ہوگا، تاہم ابھی کوئی باضابطہ دستاویز تیار نہیں کی گئی۔
انہوں نے کہا کہ صرف سندھ یا پنجاب کی تقسیم کے بجائے پورے ملک میں نئے انتظامی یونٹس بننے چاہئیں۔
پیپلز پارٹی کے رہنما میاں رضا ربانی نے کہا کہ ریفرنڈم آئین کے آرٹیکل 239 کا متبادل نہیں ہو سکتا، صوبائی حدود میں تبدیلی کا اختیار صرف صوبائی اسمبلی کو ہے۔
دوسری جانب ایم کیو ایم پاکستان کے رہنما اور وفاقی وزیر صحت سید مصطفیٰ کمال نے کراچی میں خطاب کرتے ہوئے کہا کہ ملک کی ترقی اور سلامتی کے لیے نئے صوبے ناگزیر ہیں۔