اسلام آباد – پاکستان نے امریکا کے اس فیصلے کا خیرمقدم کیا ہے جس کے تحت بلوچ لبریشن آرمی (بی ایل اے) اور اس کے ذیلی گروپ مجید بریگیڈ کو ’’غیر ملکی دہشت گرد تنظیموں‘‘ کی فہرست میں شامل کیا گیا ہے۔ یہ اقدام عالمی سطح پر انسدادِ دہشت گردی کے تعاون میں ایک اہم پیش رفت قرار دیا جا رہا ہے۔
منگل کو جاری کیے گئے ایک بیان میں وزارتِ خارجہ نے بتایا کہ پاکستان نے مجید بریگیڈ کو پہلے ہی 18 جولائی 2024 کو ملکی انسدادِ دہشت گردی قوانین کے تحت کالعدم قرار دے دیا تھا۔ بیان میں واضح کیا گیا کہ بی ایل اے اور مجید بریگیڈ پاکستان میں متعدد خونی حملوں میں ملوث رہے ہیں، جن میں جعفر ایکسپریس دھماکہ اور خضدار بس حملہ شامل ہیں، جن میں بے شمار قیمتی جانیں ضائع ہوئیں۔
وزارتِ خارجہ کے مطابق "پاکستان دہشت گردی کے خلاف ایک مضبوط دیوار کی حیثیت رکھتا ہے”۔ بیان میں مزید کہا گیا کہ ملک کی قربانیوں کے نتیجے میں نہ صرف قومی سلامتی بلکہ خطے کے استحکام اور عالمی امن کے لیے بھی اہم کامیابیاں حاصل ہوئی ہیں۔
پاکستان نے اپنے شہریوں کے تحفظ اور دہشت گردی کے ہر شکل و صورت کے خاتمے کے عزم کو ایک بار پھر دوہرایا اور عالمی برادری کے ساتھ قریبی تعاون جاری رکھنے کا یقین دلایا تاکہ اس مشترکہ چیلنج پر قابو پایا جا سکے۔
