اسلام آباد – 6 اگست 2025:
اوورسیز پاکستانیوں کے لیے حکومت نے ایک ایسا اہم قانونی قدم اٹھایا ہے جس کا طویل عرصے سے مطالبہ کیا جا رہا تھا۔ اب اگر کوئی پاکستانی بیرونِ ملک کی شہریت حاصل کرتا ہے تو اسے اپنی پاکستانی شہریت ترک نہیں کرنا پڑے گی۔
پاکستان سٹیزن شپ ترمیمی بل 2025 منگل کے روز قومی اسمبلی میں وزیرِ مملکت برائے پارلیمانی امور طلال چوہدری نے پیش کیا، جسے مزید غور و خوض کے لیے متعلقہ قائمہ کمیٹی کے سپرد کر دیا گیا ہے۔
ایوان سے خطاب کرتے ہوئے طلال چوہدری کا کہنا تھا کہ یہ بل بیرونِ ملک مقیم پاکستانیوں کے بنیادی حقوق کی بحالی اور دوہری شہریت رکھنے والے پاکستانیوں کو درپیش مسائل کے حل کے لیے پیش کیا گیا ہے۔ انہوں نے وضاحت کی کہ مجوزہ قانون کے تحت اب پاکستانی شہریوں کو کسی دوسری ملک کی شہریت اختیار کرنے پر پاکستانی شہریت چھوڑنے کی ضرورت نہیں ہوگی۔
ان کا مزید کہنا تھا کہ پاکستان نے ان ممالک کے ساتھ باقاعدہ معاہدے کر رکھے ہیں جہاں دوہری شہریت کی اجازت دی جاتی ہے، اور یہ قانون سازی ان معاہدوں کو مدنظر رکھتے ہوئے کی جا رہی ہے تاکہ بیرونِ ملک مقیم پاکستانی اپنی شناخت اور قانونی حیثیت سے محروم نہ ہوں۔
تاہم، بل پر تنقید بھی سامنے آئی۔ قومی اسمبلی کے رکن سید نوید قمر نے صدارتی آرڈیننس کے اجرا پر اعتراض کرتے ہوئے کہا کہ جب پارلیمنٹ موجود ہے تو تمام قانون سازی اسی فورم سے ہونی چاہیے، آرڈیننس کے ذریعے نہیں۔
اجلاس کے دوران موٹر وہیکل انڈسٹری ڈیولپمنٹ بل 2024 بھی پیش کیا گیا، جس کا مقصد پاکستان میں آٹو انڈسٹری کی بہتری اور ترقی کے لیے جامع قانون سازی کرنا ہے۔
تجزیہ کاروں کا کہنا ہے کہ یہ بل حکومت کے اصلاحاتی ایجنڈے کی ایک اہم کڑی ہے جو نہ صرف اوورسیز پاکستانیوں کو قانونی تحفظ فراہم کرے گا بلکہ ملک میں صنعتی ترقی کی راہ بھی ہموار کرے گا۔
اگر یہ بل منظور ہو جاتا ہے تو دنیا بھر میں مقیم لاکھوں پاکستانیوں کے لیے ایک بہت بڑا ریلیف ثابت ہو سکتا ہے، جو برسوں سے قومی شناخت اور بین الاقوامی مواقع کے درمیان انتخاب کرنے پر مجبور تھے۔
