27 اگست 2025 – اسلام آباد انٹرنیشنل اور جناح انٹرنیشنل ایئرپورٹ کراچی پر سفر کرنے والے افراد کو اب پارکنگ کے لیے پہلے سے زیادہ رقم ادا کرنا ہوگی، کیونکہ حکام نے خاموشی سے پارکنگ چارجز بڑھا دیے ہیں۔
نئی شرح کے مطابق پہلے تین گھنٹوں کی پارکنگ فیس 100 روپے سے بڑھا کر 120 روپے کر دی گئی ہے۔ اس کے بعد فی گھنٹہ چارجز 50 روپے کے بجائے 70 روپے وصول کیے جائیں گے۔
مسافروں نے اضافے پر سخت ناراضی کا اظہار کیا ہے اور کہا ہے کہ زیادہ فیس لینے کے باوجود بنیادی سہولیات میسر نہیں ہیں۔ نہ پارکنگ میں سایہ دار جگہ فراہم کی گئی ہے اور نہ ہی گاڑی کو کسی نقصان کی صورت میں ذمہ داری لی جاتی ہے۔ ایک مسافر نے شکایت کرتے ہوئے کہا: "زیادہ پیسے لیتے ہیں لیکن گاڑی کی کوئی ذمہ داری نہیں اٹھاتے۔” سول ایوی ایشن اتھارٹی کے حکام اس معاملے پر خاموش ہیں۔
یہ اقدام ایسے وقت میں کیا گیا ہے جب سندھ حکومت نے شہریوں کو بڑا ریلیف دیتے ہوئے کراچی کے 25 ٹاؤنز میں سڑکوں پر پارکنگ فیس مکمل طور پر ختم کرنے کا اعلان کیا ہے۔ جاری کردہ نوٹیفکیشن کے مطابق اب شہر کی کسی بھی سڑک پر پارکنگ فیس نہیں لی جائے گی۔ صرف پلازہ جات، پلاٹس یا مخصوص کونسل کے منظور شدہ مقامات پر ہی پارکنگ فیس وصول کرنے کی اجازت ہوگی۔ حکومت نے ہدایت کی ہے کہ شہریوں سے غیرقانونی طور پر پارکنگ فیس وصول کرنے والوں کے خلاف فوری کارروائی کی جائے گی۔
بہت سے لوگوں کے لیے یہ صورت حال تضاد کا منظر پیش کرتی ہے: کراچی کے شہری جہاں سڑکوں پر پارکنگ فیس سے آزاد ہو گئے ہیں، وہیں ایئرپورٹ آنے جانے والے مسافروں کو بڑھتی ہوئی لاگت کا سامنا ہے، وہ بھی بغیر کسی سہولت میں بہتری کے
