کراچی – 1 جولائی 2025: لانڈھی کراچی سے تعلق رکھنے والے 70 سالہ اسکریپ ڈیلر، معین الدین کو اغوا کر لیا گیا ہے، اور اغوا کاروں نے رہائی کے بدلے 2 کروڑ روپے، دو رادو گھڑیاں، اور دو آئی فونز کا مطالبہ کیا ہے۔ یہ واقعہ علاقے میں خوف و ہراس پھیلانے کا باعث بنا ہے۔
معین الدین 21 جون کو سکریپ خریدنے کے لیے صادق آباد جانے کے ارادے سے گھر سے روانہ ہوئے تھے۔ ان کے بیٹے ذیشان کے مطابق، وہ صبح 6 بج کر 10 منٹ پر انہیں لانڈھی ریلوے اسٹیشن کے قریب چھوڑ کر واپس آگئے تھے۔
اگلے روز، معین الدین کے بڑے بیٹے غیاث الدین نے اپنے والد سے رابطے کی کوشش کی، لیکن دونوں نمبرز بند ملے۔ وقت گزرنے کے ساتھ ساتھ تشویش بڑھتی گئی، کیونکہ ان کی جانب سے کوئی اطلاع موصول نہیں ہوئی۔
پھر 23 جون کی دوپہر 1 بج کر 45 منٹ پر، دونوں بھائیوں کو اپنے والد کے نمبر سے ایک پیغام موصول ہوا، جس میں بتایا گیا کہ معین الدین کو اغوا کر لیا گیا ہے اور وہ کسی نامعلوم مقام پر قید ہیں۔ اس پیغام کے فوراً بعد ایک ویڈیو بھی بھیجی گئی، جس میں انہیں برہنہ حالت میں تشدد کا نشانہ بنتے ہوئے دیکھا جا سکتا ہے۔ یہ ویڈیو دیکھ کر گھر والے سکتے میں آ گئے۔
اغوا کاروں نے دھمکی دی کہ اگر ان کے مطالبات دو دن کے اندر پورے نہ کیے گئے، تو معین الدین کو قتل کر دیا جائے گا۔
اہل خانہ نے فوراً قائد آباد تھانے سے رجوع کیا، جہاں نامعلوم افراد کے خلاف مقدمہ درج کر لیا گیا ہے۔ پولیس حکام کا کہنا ہے کہ معاملے کو انتہائی سنجیدگی سے لیا جا رہا ہے، اور متاثرہ شخص کی تلاش کے لیے تحقیقات شروع کر دی گئی ہیں۔
تاحال یہ واضح نہیں ہو سکا کہ اغوا مقامی جرائم پیشہ گروہ کا کام ہے یا کسی منظم گروہ کی کارروائی، تاہم ذرائع کا کہنا ہے کہ جس طریقے سے یہ اغوا انجام دیا گیا، وہ کسی باقاعدہ منصوبہ بندی کا نتیجہ لگتا ہے۔ ادھر معین الدین کے اہل خانہ شدید ذہنی کرب میں مبتلا ہیں اور انہوں نے قانون نافذ کرنے والے اداروں اور خفیہ ایجنسیوں سے فوری کارروائی کی اپیل کی ہے
