اسلام آباد:
پاکستان محکمہ موسمیات (پی ایم ڈی) نے پیر (آج) سے ملک کے مختلف علاقوں میں تیز ہواؤں کے ساتھ بارشوں اور گرج چمک کا نیا سلسلہ شروع ہونے کی پیشگوئی کی ہے اور شہریوں کو ہدایت کی ہے کہ اس دوران محتاط رہیں اور غیر ضروری سفر سے گریز کریں۔
محکمہ موسمیات کے مطابق اسلام آباد، سندھ کے کچھ حصوں، جنوبی پنجاب، کشمیر، شمال مشرقی و جنوبی بلوچستان اور خیبر پختونخوا کے بالائی علاقوں میں آئندہ چند روز کے دوران بارش اور گرج چمک متوقع ہے۔
پی ایم ڈی کا کہنا ہے کہ گزشتہ 24 گھنٹوں کے دوران ملک کے بیشتر علاقوں میں موسم گرم اور مرطوب رہا۔ تاہم، جنوبی سندھ، مشرقی بلوچستان اور کشمیر کے کچھ حصوں میں موسلا دھار بارش کا امکان ہے جبکہ ملک کے باقی حصوں میں گرمی اور حبس برقرار رہے گا۔
اسلام آباد اور گرد و نواح میں موسم جزوی طور پر ابر آلود اور مرطوب رہنے کا امکان ہے، جبکہ رات کے وقت بارش کی توقع ہے۔ خیبر پختونخوا کے بیشتر اضلاع میں بھی موسم گرم اور مرطوب رہے گا، تاہم دیر، سوات، کوہستان، ملاکنڈ، مانسہرہ، ایبٹ آباد، کرم اور وزیرستان میں کہیں کہیں گرج چمک کے ساتھ بارش اور تیز ہوائیں چلنے کا امکان ہے۔
پنجاب میں مجموعی طور پر موسم جزوی ابر آلود اور مرطوب رہے گا، البتہ بہاولپور، رحیم یار خان، راجن پور اور ڈیرہ غازی خان میں بارش اور گرج چمک متوقع ہے۔ راولپنڈی، مری، گلیات، گوجرانوالہ، سیالکوٹ، نارووال، لاہور اور گرد و نواح میں بھی گرج چمک کے ساتھ بارش ہونے کا امکان ہے۔
سندھ کے علاقوں میرپور خاص، مٹھی، تھرپارکر، بدین، سجاول، عمرکوٹ، چھاچھرو، پڈعیدن، خیرپور، کراچی، ٹھٹھہ، گھوٹکی، چھور، سکھر، کشمور، شکارپور، جیکب آباد، لاڑکانہ، نوشہرو فیروز، سانگھڑ، دادو، حیدرآباد، ٹنڈو الہ یار، ٹنڈو محمد خان، مٹیاری اور شہید بے نظیر آباد میں بارش اور گرج چمک کی پیشگوئی ہے، جبکہ کچھ مقامات پر موسلا دھار بارش کا امکان بھی ظاہر کیا گیا ہے۔
بلوچستان میں زیادہ تر علاقے گرم اور مرطوب رہیں گے، تاہم بارکھان، سبی، کوہلو، موسیٰ خیل، قلعہ سیف اللہ، لورالائی، ڈیرہ بگٹی، نصیر آباد، ژوب، قلات، خضدار، آواران اور لسبیلہ میں بارش اور گرج چمک کا امکان ہے۔
کشمیر اور گلگت بلتستان میں بھی موسم جزوی طور پر ابر آلود رہنے کے ساتھ بارش اور گرج چمک کی پیشگوئی کی گئی ہے، جبکہ کشمیر کے چند مقامات پر موسلا دھار بارش ہو سکتی ہے۔
محکمہ موسمیات نے شہریوں کو مشورہ دیا ہے کہ گرج چمک کے دوران محتاط رہیں، بلا ضرورت سفر سے گریز کریں اور تیز ہواؤں اور بارش کے دوران محفوظ مقامات پر قیام کو یقینی بنائیں۔
