کراچی – گلشنِ حدید کے علاقے میں مسلح ڈاکو دن دہاڑے ایک گھر سے لاکھوں روپے مالیت کا سونا اور نقدی لوٹ کر فرار ہوگئے، پولیس نے منگل کے روز تصدیق کی۔
تفصیلات کے مطابق، مسلح افراد کے ایک گروہ نے گھر میں زبردستی داخل ہوکر اہلِ خانہ کو اسلحے کے زور پر یرغمال بنا لیا۔ ملزمان 10 تولے سونا اور 15 لاکھ روپے نقدی لوٹنے کے بعد موٹر سائیکلوں پر فرار ہوگئے۔
پولیس ذرائع کا کہنا ہے کہ ملزمان جدید اسلحے سے لیس تھے اور واردات نہایت منصوبہ بندی سے انجام دی گئی۔ واردات کے بعد متاثرہ خاندان خوفزدہ تو ہوا مگر کسی قسم کا جانی نقصان نہیں ہوا۔ پولیس نے ملزمان کی گرفتاری کے لیے سرچ آپریشن شروع کردیا ہے تاہم رپورٹ فائل ہونے تک کوئی گرفتاری عمل میں نہیں آئی۔ یہ واقعہ ایسے وقت میں پیش آیا ہے جب چند ہفتے قبل ہی شہر میں ایک اور بڑی چوری کا واقعہ رونما ہوا تھا، جس میں ایک نئی بھرتی ہونے والی گھریلو ملازمہ پر الزام ہے کہ اس نے اپنے مالکان کے فلیٹ سے قیمتی سامان چرا لیا۔ اس واردات میں 48 تولے سونا اور ایک لاکھ پچاس ہزار روپے نقدی چرائی گئی تھی۔ پولیس کے مطابق، ملازمہ صرف پندرہ دن پہلے ہی بھرتی ہوئی تھی اور واردات کے روز ایک دوسری عورت کو بھی فلیٹ میں لے کر آئی تھی۔ اہلِ خانہ دوپہر کے وقت کھانے کے لیے گھر سے باہر گئے ہوئے تھے جب یہ واردات ہوئی
