کراچی — پاکستان پیٹرولیم لمیٹڈ (پی پی ایل) نے سندھ کے ضلع جامشورو میں واقع کوٹری نارتھ بلاک کے بارکی-1 ایکسپلوریشن ویل سے قدرتی گیس کی کامیاب دریافت کا اعلان کیا ہے، جو ملکی توانائی کے ذخائر کی تلاش میں ایک اہم پیش رفت قرار دی جا رہی ہے۔
پاکستان اسٹاک ایکسچینج (پی ایس ایکس) کو جمع کرائی گئی رپورٹ میں کمپنی نے بتایا کہ یہ کنواں ایک مشترکہ منصوبے (جائنٹ وینچر) کا حصہ ہے جس کی قیادت یونائیٹڈ انرجی پاکستان لمیٹڈ (یو ای پی ایل) کر رہی ہے، جبکہ پی پی ایل اور ایشیا ریسورسز آئل لمیٹڈ اس کے شراکت دار ہیں۔
بارکی-1 کنویں کی کھدائی 21 جولائی 2025 کو شروع کی گئی تھی، جو 3,392 فٹ کی گہرائی تک مکمل کی گئی، تاکہ لیٹ کریٹیشیس اور ارلی پیلوسین فارمیشنز کو ہدف بنایا جا سکے۔
پی پی ایل کے مطابق، وائر لائن لاگز سے حاصل ہونے والے ڈیٹا نے مثبت اشارے دیے جس کے بعد مشترکہ ٹیم نے ماڈیولر ڈائنامک ٹیسٹنگ (ایم ڈی ٹی) کا عمل مکمل کیا۔ ٹیسٹ کے نتائج نے ’پاب فارمیشن‘ کے سینڈ اسٹون لیئرز میں ہائیڈروکاربنز کی موجودگی کی تصدیق کی، جو لیٹ کریٹیشیس دور سے تعلق رکھتی ہیں۔ ان نتائج کے بعد کنویں کو مکمل کر کے ان زونز میں سوراخ کیے گئے جہاں گیس کے امکانات زیادہ تھے۔
ابتدائی ’کمپلیشن انٹیگریٹی ٹیسٹ‘ (سی آئی ٹی) کے دوران کنویں سے یومیہ تقریباً 1.5 ملین مکعب فٹ گیس حاصل ہوئی۔ بعد ازاں جب ان زونز میں ایسڈ اسٹیمولیشن کا عمل کیا گیا تو گیس کی پیداوار میں نمایاں اضافہ ہوا اور یہ بڑھ کر تقریباً 5.5 ملین مکعب فٹ روزانہ تک پہنچ گئی، جبکہ کنویں کے پریشر میں بھی نمایاں اضافہ ریکارڈ کیا گیا جو 200 پی ایس آئی جی سے بڑھ کر 460 پی ایس آئی جی تک جا پہنچا۔
ماہرین کے مطابق، بارکی-1 کی دریافت اس بات کا واضح ثبوت ہے کہ کوٹری نارتھ بلاک میں موجود پاب سینڈز میں مزید گیس کے امکانات موجود ہیں۔ مشترکہ منصوبہ اب اسی بلاک میں دیگر مشابہہ جغرافیائی مقامات پر مزید کنوؤں کی کھدائی پر غور کر رہا ہے تاکہ ان وسائل سے زیادہ سے زیادہ فائدہ حاصل کیا جا سکے۔
اس منصوبے میں یونائیٹڈ انرجی پاکستان لمیٹڈ 50 فیصد ورکنگ انٹرسٹ کے ساتھ آپریٹر کے طور پر کام کر رہی ہے، جبکہ پاکستان پیٹرولیم لمیٹڈ کے پاس 40 فیصد اور ایشیا ریسورسز آئل لمیٹڈ کے پاس 10 فیصد حصہ ہے۔
کمپنی کی جانب سے یہ اعلان سیکیورٹیز ایکٹ 2015 اور پاکستان اسٹاک ایکسچینج کے قواعد کے تحت کیا گیا۔
