پاکستان نیوی کے روشن خان جہانگیر خان اسکواش کمپلیکس میں ایک خصوصی ویمنز اسکواش کلینک کامیابی سے منعقد ہوا، جسے احمر عباس خاندان کی معاونت حاصل تھی۔
اس کلینک کا مقصد خواتین کو قومی سطح پر اسکواش میں زیادہ شرکت کی ترغیب دینا اور کھیل کے میدان میں ان کی موجودگی کو مضبوط بنانا تھا۔
کوچ نوید عالم نے مختلف تعلیمی اداروں سے آئی ہوئی نوجوان لڑکیوں کو اسکواش کی تربیت اور آگاہی فراہم کی۔ کلینک میں قومی سطح کی خواتین کھلاڑیوں اور اسپورٹس ٹیچرز نے بھی حصہ لیا۔
تقریب کے اختتام پر سرٹیفکیٹ تقسیم کرنے کی تقریب بھی منعقد ہوئی، جس میں شرکاء کی حوصلہ افزائی کی گئی۔
اس موقع پر کوچ نوید عالم نے کہا:
"یہ کلینک ایک اہم موقع تھا تاکہ لڑکیوں کو اسکواش کے میدان میں لایا جا سکے۔ احمر عباس جیسے فلاحی خاندانوں کی مدد سے ہم مزید ایسے مواقع پیدا کر سکتے ہیں۔”
محمد افضل، اسسٹنٹ منیجر اسکواش کمپلیکس نے کہا:
"ہم خواتین کے اسکواش کے فروغ کے لیے پرعزم ہیں، اور جلد ہی قومی سطح پر نیا ٹیلنٹ سامنے آئے گا۔”
معروف اسپورٹس اینکر آصف خان نے کہا:
"جہانگیر خان جیسے چیمپیئنز بنانا انتھک محنت اور لگن سے ہی ممکن ہے۔”
سینئر اسپورٹس جرنلسٹ زبیر نذیر خان نے زور دیا:
"پاکستان میں اسکواش کے مستقبل کو محفوظ بنانے کے لیے ایسے مزید اقدامات ناگزیر ہیں۔”
