کراچی:
کراچی میں مسلسل بارش کے نتیجے میں ملیر ندی کا پانی خطرناک حد تک بڑھ گیا ہے، جس کے باعث انتظامیہ نے تین اہم گزرگاہیں بند کر کے ٹریفک کو متبادل راستوں پر موڑ دیا ہے۔
ڈپٹی کمشنر کورنگی مسعود بھٹو نے تصدیق کی ہے کہ کورنگی کاز وے، کورنگی کراسنگ اور گلشنِ حدید سے حیدرآباد جانے والا لنک روڈ پانی کے دباؤ کے باعث بند کر دیے گئے ہیں۔ انہوں نے کہا کہ ٹریفک پولیس نے صورت حال پر قابو پا لیا ہے اور گاڑیوں کو محفوظ راستوں پر منتقل کیا جا رہا ہے۔
مسعود بھٹو نے شہریوں کو ہدایت دی کہ کورنگی آنے اور جانے والے افراد جام صادق پل استعمال کریں۔ ان کا کہنا تھا کہ ملیر ندی کا پانی کم ہونے پر تینوں گزرگاہیں دوبارہ کھول دی جائیں گی۔
اس وقت ٹریفک کو قیوم آباد سے گودام چورنگی اور سی این جی کٹ ایریا سے گودام چورنگی کی طرف موڑا جا رہا ہے تاکہ دباؤ کم ہو۔
شہر میں کئی گھنٹوں سے جاری ہلکی اور تیز بارش نے نکاسیٔ آب کے نظام کو متاثر کیا ہے اور ندی نالوں میں طغیانی پیدا کر دی ہے۔ صورتحال اس وقت مزید سنگین ہو گئی جب بلوچستان کے کیرتھر پہاڑی سلسلے اور گڈاپ کٹھور میں بارشوں کے بعد سیلابی ریلے کراچی کی جانب بڑھے۔
ان بارشوں کے نتیجے میں مول ندی، خدیجی ندی اور جارندہ ندی کا پانی ملیر ندی میں شامل ہو گیا جس سے اس کا پانی خطرناک سطح تک بلند ہوگیا۔ اطلاعات کے مطابق نشیبی علاقوں میں پانی گھروں میں داخل ہونا شروع ہو گیا ہے، جبکہ بارش کا سلسلہ تاحال جاری ہے اور فوری کمی کے کوئی آثار نظر نہیں آ رہے۔
