کراچی:
اتوار کے روز ماری پور کے قریب ہاکس بے روڈ پر ایک خوفناک ٹریفک حادثے نے چار قیمتی جانیں لے لیں جبکہ چھ افراد زخمی ہوگئے، جن میں سے تین کی حالت تشویشناک بتائی جا رہی ہے۔
متاثرہ افراد کا تعلق پنجاب سے تھا اور وہ ساحل پر تفریح کے بعد گھر واپس جا رہے تھے کہ راستے میں ان کی گاڑی الٹ گئی۔ ابتدائی اطلاعات کے مطابق گاڑی تیز رفتاری کے باعث بے قابو ہوکر پہلے دیوار سے ٹکرائی اور پھر زور دار دھچکے سے الٹ گئی۔
حادثے میں جان کی بازی ہارنے والوں میں 45 سالہ ڈرائیور یوسف دین ڈوگر، 40 سالہ خاتون خالدہ، 7 سالہ زینب اور 10 سالہ عائشہ شامل ہیں۔
زخمی ہونے والوں میں 20 سالہ زین، 4 سالہ حسین، 8 سالہ فاطمہ، 42 سالہ صباء اور دو کم عمر لڑکیاں سحر اور انوشہ شامل ہیں۔ تمام زخمیوں کو فوری طور پر سول اسپتال کراچی منتقل کیا گیا جہاں ڈاکٹروں کے مطابق تین کی حالت نازک ہے۔
ڈی آئی جی ٹریفک پیر محمد شاہ نے حادثے کی جگہ کا دورہ کیا اور اسے رواں سال کے سب سے سنگین حادثات میں سے ایک قرار دیا۔ انہوں نے بتایا کہ یہ سڑک کئی حوالوں سے ڈرائیورز کے لیے خطرناک ہے اور فوری حفاظتی اقدامات کیے جائیں گے تاکہ مستقبل میں ایسے سانحات سے بچا جا سکے۔ انہوں نے مزید کہا کہ متاثرہ خاندان شدید صدمے کی حالت میں ہے اور فی الحال کسی باضابطہ بیان کے قابل نہیں
