کراچی:
کراچی کے نازک پانی کے نظام کو ایک اور دھچکا اس وقت لگا جب 12 ارب روپے کی لاگت سے حال ہی میں تعمیر ہونے والا حب کینال طوفانی بارشوں اور سیلابی ریلوں کی نذر ہوگیا، جس کے بعد شہر کے کئی علاقوں میں پانی کی فراہمی معطل ہوگئی ہے۔
سرکاری حکام کے مطابق نیا حب کینال، جس کا افتتاح چیئرمین پیپلز پارٹی بلاول بھٹو زرداری نے 13 اگست کو کیا تھا، نادرن بائی پاس کے قریب شدید بارشوں کے باعث نقصان کا شکار ہوا۔ بتایا گیا ہے کہ شہر کے نکاسیٔ آب کے نظام سے آنے والے سیلابی ریلے نے پرانے اور نئے دونوں کینال کو ٹکر ماری، جس کے نتیجے میں تقریباً 20 میٹر کا حصہ بیٹھ گیا۔
کراچی واٹر اینڈ سیوریج بورڈ (کے ڈبلیو ایس بی) کے ترجمان نے تصدیق کرتے ہوئے کہا، "حب کینال کو سیلابی ریلے سے نقصان پہنچا ہے۔ ایمرجنسی مرمتی کام شروع کردیا گیا ہے جو آئندہ 36 گھنٹوں میں مکمل کرلیا جائے گا۔” ترجمان نے مزید بتایا کہ کینال کے اوپر سے گزرتی سوئی گیس کی پائپ لائن بھی اپنی جگہ سے ہٹ گئی ہے جس سے صورتحال مزید پیچیدہ ہوگئی ہے۔
حب کینال کے ٹوٹنے کے بعد کراچی کے مغربی، وسطی اور کیماڑی اضلاع کو پانی کی فراہمی بند ہوگئی ہے، جس کے باعث شہریوں کو سنگین قلت کا سامنا ہے۔ حکام نے عوام سے اپیل کی ہے کہ مرمتی کام مکمل ہونے تک پانی احتیاط کے ساتھ استعمال کریں۔
یہ منصوبہ، جسے شہر کے لیے "لائف لائن” قرار دیا گیا تھا، کراچی کے پانی کی تقسیم میں بہتری کے لیے بنایا گیا تھا، مگر افتتاح کے صرف چند ہفتوں بعد اس کی تباہی نے تعمیراتی معیار اور عوامی منصوبوں کی پائیداری پر سنگین سوالات کھڑے کردیئے ہیں۔
