نیویارک (23 ستمبر 2025): پاکستان کے نائب صدر اور وزیر خارجہ اسحاق ڈار نے اقوام متحدہ کی جنرل اسمبلی کے موقع پر شام کے صدر احمد الشرع سے اہم ملاقات کی، جس میں اسلام آباد نے شامی عوام کے ساتھ یکجہتی اور بھرپور تعاون کا اعادہ کیا۔
سماجی رابطے کی ویب سائٹ ایکس پر جاری اپنے پیغام میں اسحاق ڈار نے بتایا کہ ملاقات کے دوران پاکستان نے شام کے ساتھ تاریخی دوستی کو مزید گہرا کرنے کے عزم کا اظہار کیا۔ ان کا کہنا تھا کہ "ہم نے اس بات پر اتفاق کیا کہ تجارت، افرادی قوت اور ترقی سمیت مختلف شعبوں میں تعاون کو بڑھایا جائے۔”
صدر احمد الشرع کی جنرل اسمبلی میں شرکت تاریخی نوعیت کی حامل رہی کیونکہ وہ تقریباً چھ دہائیوں بعد اس عالمی فورم میں شریک ہونے والے پہلے شامی رہنما ہیں۔ ماہرین کے مطابق یہ ملاقات مشرقِ وسطیٰ کی بدلتی سفارت کاری کے تناظر میں اہم علامتی حیثیت رکھتی ہے۔
شامی صدر سے ملاقات کے علاوہ اسحاق ڈار نے اقوام متحدہ کے ہیڈکوارٹرز میں منعقدہ او آئی سی کے خصوصی اجلاس میں بھی شرکت کی۔ اس موقع پر انہوں نے فلسطین اور کشمیر کے مسائل کو اجاگر کیا اور اسلاموفوبیا کے بڑھتے رجحان پر تشویش ظاہر کی۔ ان کا کہنا تھا کہ مسلم دنیا میں باہمی تقسیم ختم کرنا ناگزیر ہے کیونکہ یہ تقسیم مسلمانوں کے بنیادی حقوق کے تحفظ کی اجتماعی جدوجہد کو کمزور کرتی ہے۔
نائب صدر نے کینیڈا کی وزیر خارجہ انیتا آنند سے بھی ملاقات کی، جس میں دونوں ممالک کے درمیان تجارتی اور اقتصادی تعلقات کو مزید فروغ دینے پر اتفاق ہوا۔ بعد ازاں دولتِ مشترکہ وزرائے خارجہ کے اجلاس میں شرکت کرتے ہوئے اسحاق ڈار نے عالمی سطح پر جاری تنازعات، ماحولیاتی تباہ کاریوں، معاشی مسائل اور تیز رفتار ٹیکنالوجی کی تبدیلیوں کا ذکر کیا۔ انہوں نے خبردار کیا کہ ماحولیاتی بحران کئی رکن ممالک کے لیے سنگین خطرہ ہے اور پاکستان دنیا کے سب سے زیادہ ماحولیاتی طور پر غیر محفوظ ممالک میں شامل ہے۔
سفارتی ماہرین کا کہنا ہے کہ اسحاق ڈار کی یہ ملاقاتیں اور بیانات اس بات کی عکاسی کرتے ہیں کہ پاکستان ایک جانب اپنی روایتی شراکت داری کو مضبوط بنا رہا ہے جبکہ دوسری جانب ابھرتے ہوئے عالمی چیلنجز سے نمٹنے اور مسلم اُمہ کے مسائل کو عالمی پلیٹ فارمز پر اجاگر کرنے کی کوشش کر رہا ہے۔
