اسلام آباد — وزیرِاعظم شہباز شریف نے جمعے کے روز اعلان کیا کہ پاکستان 2027 میں شنگھائی تعاون تنظیم (SCO) کا سربراہی اجلاس منعقد کرے گا اور متعلقہ حکام کو ہدایت دی کہ تیاریوں کا آغاز ابھی سے کیا جائے۔
یہ اعلان انہوں نے ٹی چوک فلائی اوور کے افتتاح کے موقع پر کیا۔ وزیرِاعظم نے اسے اسلام آباد، راولپنڈی اور گرد و نواح کے رہائشیوں کے لیے ایک بڑی سہولت قرار دیا۔ انہوں نے کہا کہ اجلاس کی تیاریوں کے تحت دارالحکومت میں نئی رہائش گاہوں کی تعمیر اور خوبصورتی کے منصوبے شروع کیے جائیں گے۔ اس موقع پر انہوں نے یہ بھی بتایا کہ تاجکستان کی جانب سے شجرکاری کے لیے پودے تحفے میں دیے گئے ہیں جبکہ سی ڈی اے اور دیگر ٹیموں نے شجرکاری مہم کا آغاز کر دیا ہے۔
وزیرِاعظم نے مزید کہا کہ اسلام آباد ایکسپریس وے اور ٹی روڈ کے سنگم پر تعمیر ہونے والا ایک کلو میٹر طویل فلائی اوور جڑواں شہروں کے ہزاروں مسافروں کے لیے ٹریفک کے دباؤ میں نمایاں کمی لائے گا۔ انہوں نے اس بات پر بھی زور دیا کہ مجوزہ ریل کار منصوبہ شہریوں کے لیے مزید آسانیاں فراہم کرے گا اور حکومت یہ یقینی بنائے گی کہ تمام ترقیاتی منصوبے اعلیٰ معیار کے مطابق مکمل ہوں۔
وفاقی وزیرِداخلہ محسن نقوی بھی تقریب میں شریک تھے۔ انہوں نے کہا کہ فلائی اوور 150 دن میں مکمل کر لیا جائے گا اور تعمیراتی معیار پر کوئی سمجھوتہ نہیں کیا جائے گا۔ حکام نے وزیرِاعظم کو بریفنگ میں بتایا کہ ایک ارب 49 کروڑ 50 لاکھ روپے کی لاگت سے بننے والا یہ منصوبہ روزانہ تقریباً 41 ہزار 572 گاڑیوں کو سہولت فراہم کرے گا اور اس کی تکمیل 9 فروری 2026 تک متوقع ہے۔
منصوبہ سی ڈی اے کی خود مالی اعانت سے شروع کیا گیا ہے اور اس کے لیے کسی اضافی زمین کے حصول کی ضرورت نہیں پڑی، جس سے تقریباً 7 ارب روپے کی بچت ہوئی۔ وزیرِداخلہ نقوی نے سی ڈی اے، نیسپاک اور دیگر اداروں کو اس منصوبے کی مؤثر منصوبہ بندی پر سراہا اور کہا کہ اس سے نہ صرف اخراجات میں کمی ہوئی بلکہ بروقت تکمیل بھی ممکن ہو گی۔
