لاہور:
سیلاب سے متاثرہ پنجاب کے علاقوں میں انکشاف ہوا ہے کہ نجی کشتی مالکان بے سہارا خاندانوں سے بھاری رقوم وصول کر رہے ہیں، بعض متاثرہ خاندانوں سے حفاظت تک پہنچانے کے لیے ایک لاکھ روپے تک مانگے جا رہے ہیں۔
جلالپور پیروالہ سے موصولہ اطلاعات کے مطابق اس نام نہاد ’’بوٹ مافیا‘‘ نے فی کس دس ہزار روپے اور فی خاندان ایک لاکھ روپے تک وصول کیے۔ لیاقت پور سے بھی ایسی ہی شکایات سامنے آئیں، جہاں متاثرین کا کہنا ہے کہ ان کی مجبوری کو کمائی کا ذریعہ بنا دیا گیا ہے۔ کئی خاندانوں نے بتایا کہ بعض اوقات ایک مسافر کے بدلے کشتی میں ایک جانور، بکری یا گائے رکھنے کی شرط بھی عائد کی گئی۔
اس کھلے استحصال پر وزیر اعلیٰ پنجاب مریم نواز نے سخت برہمی کا اظہار کرتے ہوئے فوری کریک ڈاؤن کا حکم دیا۔ ان کا کہنا تھا: “سیلاب کے نام پر عوام کا استحصال کسی صورت برداشت نہیں کیا جائے گا۔” انہوں نے واضح کیا کہ اب تمام ریسکیو کشتیاں سرکاری نگرانی میں چلیں گی اور نجی کشتی مالکان کو متاثرین سے نہیں بلکہ حکومت سے معاوضہ دیا جائے گا۔
وزیر اعلیٰ کے ترجمان کے مطابق ملتان سمیت متاثرہ اضلاع کے کمشنرز اور ڈپٹی کمشنرز کو ہدایت جاری کر دی گئی ہے کہ متاثرہ علاقوں کی کڑی نگرانی کی جائے تاکہ بوٹ مافیا کی لوٹ مار فوری طور پر روکی جا سکے اور متاثرین کو بروقت ریلیف فراہم ہو۔
ہزاروں بے گھر خاندانوں کے لیے یہ اقدام ایک امید کی کرن ہے کہ ان کی بقا کی جدوجہد کو اب مالی استحصال کے ساتھ مزید کٹھن نہیں بنایا جائے گا۔
