کراچی – ستمبر 2025: جیل چورنگی کے قریب ایک افسوسناک حادثے میں 45 سالہ خاتون جاں بحق ہو گئیں جب ان کا برقعہ موٹر سائیکل کی چین میں پھنس گیا۔
ریسکیو حکام کے مطابق متوفی خاتون کی شناخت شازیہ کے نام سے ہوئی ہے۔ واقعہ اس وقت پیش آیا جب ان کا برقعہ اچانک موٹر سائیکل کی چین میں الجھ گیا، جس کے باعث وہ توازن کھو بیٹھیں اور زمین پر گرنے سے موقع پر ہی دم توڑ گئیں۔
لاش کو بعدازاں قانونی کارروائی کے لیے جناح اسپتال منتقل کر دیا گیا۔ پولیس کا کہنا ہے کہ ابتدائی تحقیقات میں تصدیق ہوئی ہے کہ حادثہ برقعہ چین میں پھنسنے کے باعث پیش آیا۔
عینی شاہدین نے واقعے کو نہایت اچانک اور دل دہلا دینے والا قرار دیا۔ ایک راہگیر کے مطابق، “کپڑا پھنسنے کی دیر تھی کہ وہ فوری طور پر سڑک پر گر پڑیں۔”
پولیس حکام کا کہنا ہے کہ مزید تحقیقات جاری ہیں، جبکہ اس واقعے نے ایک بار پھر موٹر سائیکل سفر کے دوران ڈھیلے لباس کے خطرات کو اجاگر کر دیا ہے۔
