کراچی — برطانیہ جانے والے پاکستانی مسافروں کے لیے اہم پیش رفت سامنے آئی ہے، پاکستان انٹرنیشنل ایئرلائنز (پی آئی اے) نے براہِ راست پروازوں کی بحالی کے لیے تیاریاں تیز کر دی ہیں۔
ذرائع کے مطابق قومی ایئرلائن نے اپنے عملے، جن میں کیپٹن، انجینئرز اور کیبن اسٹاف شامل ہیں، کے لیے انتظامات کو حتمی شکل دینا شروع کر دی ہے۔ اس سلسلے میں مانچسٹر میں عملے کے رہائش کے لیے منصوبہ بندی جاری ہے۔ پی آئی اے کے ترجمان کا کہنا ہے کہ مانچسٹر میں ہوٹل سروسز فراہم کرنے کے لیے ٹینڈرز کھول دیے گئے ہیں اور درخواستیں 3 نومبر تک جمع کرائی جا سکیں گی، جنہیں بعد ازاں جی ایم پروکیورمنٹ، سپلائی چین ڈویژن کو بھیجا جائے گا۔
یہ پیش رفت اس وقت سامنے آئی ہے جب گزشتہ ہفتے پی آئی اے کو طویل تعطل کے بعد برطانیہ کے لیے پروازیں چلانے کی اجازت ملی۔ حکام کا کہنا ہے کہ آئندہ ماہ پہلے مرحلے میں مانچسٹر کے لیے براہِ راست پروازیں شروع کی جائیں گی جبکہ بعد ازاں لندن اور برمنگھم کے لیے بھی سروس فراہم کی جائے گی۔
قومی ایئرلائن کو مسافروں کے ساتھ ساتھ کارگو سروسز کے لیے بھی پانچ سالہ سکیورٹی اور کارگو سرٹیفکیٹس جاری کیے گئے ہیں، جس کے تحت پی آئی اے برطانیہ کے لیے مسافروں اور سامان دونوں کی پروازیں چلا سکے گی۔
براہِ راست پروازوں کی بحالی سے مسافروں کو نمایاں سہولت میسر آنے کی توقع ہے جو اب تک دوسرے فضائی اداروں کے ذریعے کنیکٹنگ فلائٹس پر انحصار کرنے پر مجبور تھے۔
