اسلام آباد، 26 ستمبر 2025 – قطر کے پاکستان میں تعینات سفیر علی مبارک علی عیسیٰ الخاطر نے کہا ہے کہ قطر میں پاکستانی ہنرمندوں کی مانگ میں اضافہ ہو رہا ہے اور ان کی تعداد بڑھانے کی خواہش پائی جاتی ہے۔
یہ اعلان وفاقی وزیر برائے آبی وسائل محمد معین وٹو سے ملاقات کے دوران سامنے آیا، جس میں دوطرفہ تعلقات، خطے کی صورتحال اور افرادی قوت کے مواقع پر تبادلہ خیال کیا گیا۔
ملاقات کے دوران وزیر معین وٹو نے اسرائیلی حملے پر قطر سے اظہار افسوس کرتے ہوئے حکومت اور عوامِ پاکستان کی نیک خواہشات کا پیغام پہنچایا۔ انہوں نے کہا کہ پاکستان اور قطر کے عوام کے درمیان محبت اور احترام کا دیرینہ رشتہ ہے۔ ساتھ ہی انہوں نے مسلم اُمہ کے اتحاد اور باہمی تعاون کے لیے پاکستان کی مستقل حمایت کو بھی اجاگر کیا۔
وفاقی وزیر نے یورپی ممالک کی جانب سے فلسطین کو تسلیم کرنے کے فیصلے کو خوش آئند قرار دیا اور کہا کہ یہ انصاف اور خطے میں دیرپا امن کے لیے ایک اہم قدم ہے۔ انہوں نے حالیہ پاک بھارت کشیدگی میں پاکستان کی سیاسی و عسکری قیادت کے عزم اور قوتِ ارادی کا بھی ذکر کیا۔
قطری سفیر نے اس موقع پر پاکستان کے ہنرمند افراد کے کردار کو سراہا اور کہا کہ پاکستانی ورک فورس نے قطر کی ترقی میں اہم کردار ادا کیا ہے۔ انہوں نے واضح کیا کہ قطر میں پاکستانی ہنرمندوں کی مانگ بڑھ رہی ہے اور مستقبل میں مزید مواقع فراہم کرنے کی خواہش ہے۔ اس کے ساتھ ہی انہوں نے پاکستان کے قدرتی وسائل کو بھی سراہا اور مکمل تعاون کی یقین دہانی کرائی۔
آخر میں دونوں رہنماؤں نے دوطرفہ تعلقات کو مزید مضبوط کرنے، مختلف شعبوں میں تعاون بڑھانے اور عوامی سطح پر تعلقات کے فروغ کے عزم کا اعادہ کیا۔
