بدھ کو جاری ایف ایف سی کی رپورٹ کے مطابق دریائے چناب میں مرالہ اور اس کے ڈاؤن اسٹریم پر غیر معمولی اونچی سیلابی لہر متوقع ہے، جبکہ دریائے ستلج گنڈا سنگھ والا پر بھارتی ذخائر سے پانی چھوڑنے کے باعث غیر معمولی اونچے درجے پر بہتا رہے گا۔
چناب میں پنجند کے مقام پر جمعرات اور جمعہ کے دوران بہت اونچے درجے کا سیلاب آنے کا امکان ہے جبکہ دریائے سندھ میں گڈو کے مقام پر 6 سے 7 ستمبر کے دوران بہت اونچا سیلاب متوقع ہے۔
فی الحال دریائے سندھ گڈو پر درمیانے درجے کے سیلاب میں ہے، دریائے چناب مرالہ تا کھنکی کے درمیان بہت اونچے درجے کے سیلاب کے ساتھ بڑھتی ہوئی حالت میں ہے، دریائے راوی جسر پر درمیانے درجے کے سیلاب کے ساتھ بڑھ رہا ہے اور دریائے ستلج گنڈا سنگھ والا پر غیر معمولی اونچے درجے میں بہہ رہا ہے۔
تربیلا ڈیم اپنی زیادہ سے زیادہ سطح 1550 فٹ پر بھر چکا ہے جبکہ منگلا ڈیم کی سطح 1227.80 فٹ ہے، جو زیادہ سے زیادہ سطح 1242 فٹ سے 14.20 فٹ کم ہے۔ تربیلا، چشمہ اور منگلا ڈیموں کا مشترکہ ذخیرہ 12.157 ایم اے ایف ہے، جو کل گنجائش کا 91.30 فیصد ہے۔
فلڈ فورکاسٹنگ ڈویژن لاہور نے آئندہ 24 گھنٹوں کے دوران اسلام آباد اور پنجاب (راولپنڈی، گجرات، گوجرانوالہ، لاہور اور ساہیوال ڈویژنز) میں بکھری ہوئی گرج چمک کے ساتھ بارش اور کہیں کہیں تیز بارش کی پیش گوئی کی ہے۔ دریائے جہلم، چناب، راوی اور ستلج کے بالائی مقامات بھی متاثر ہو سکتے ہیں۔ اس کے علاوہ پنجاب کے دیگر حصوں، خیبر پختونخوا اور شمال مشرقی بلوچستان میں بھی کہیں کہیں بارش کا امکان ہے۔
