وزیرِاعظم شہباز شریف نے متعلقہ حکام کو ہدایت کی ہے کہ رواں ماہ کے اختتام تک ایک جامع پالیسی پیش کی جائے، جس کے تحت ملک بھر کے چھوٹے اور درمیانے درجے کے کسانوں کو آسان اور سستے قرضے فراہم کیے جا سکیں۔
جمعرات کو زرعی ترقی اور زرعی فنانسنگ کے حوالے سے ایک اعلیٰ سطحی جائزہ اجلاس کی صدارت کرتے ہوئے وزیرِاعظم نے کہا کہ بارہ ایکڑ سے کم زمین رکھنے والے کسانوں کو ترجیح دی جائے تاکہ وہ جدید زرعی آلات اور مالی معاونت حاصل کر سکیں۔
وزیرِاعظم کا کہنا تھا، ’’پاکستان کی ترقی براہ راست ہمارے کسانوں کی خوشحالی اور زرعی شعبے کی جدید کاری سے جڑی ہوئی ہے۔‘‘ انہوں نے اس بات پر زور دیا کہ زرعی فنانسنگ کے نظام کو عصری عالمی تقاضوں کے مطابق ڈھالنے کی اشد ضرورت ہے۔
انہوں نے ہدایت کی کہ ایک ایسا فریم ورک تیار کیا جائے جس کے تحت کسانوں کو مصنوعی ذہانت، معیاری بیج، جدید آبپاشی کے طریقے اور جدید زرعی مشینری کے لیے باآسانی قرضے دستیاب ہو سکیں۔ ساتھ ہی انہوں نے زور دیا کہ چھوٹے پیمانے کی زرعی صنعتوں کو بھی فروغ دیا جائے تاکہ کسان اپنی پیداوار کو ویلیو ایڈڈ برآمدی مصنوعات میں بدل سکیں۔
وزیرِاعظم نے واضح کیا کہ حکومت زرعی اصلاحات کے عمل کو تیزی سے آگے بڑھا رہی ہے، تاکہ کسانوں کو درکار سہولیات، جدید تربیت اور برآمدی صلاحیت بڑھانے کے مواقع فراہم کیے جا سکیں۔
اجلاس میں جاری زرعی اصلاحات، زرعی ترقیاتی بینک لمیٹڈ کی کارکردگی، اور کسانوں کو دیے جانے والے قرضوں پر تفصیلی بریفنگ دی گئی۔
اجلاس میں نائب وزیرِاعظم اور وزیرِ خارجہ اسحاق ڈار، وفاقی وزرا احد خان چیمہ اور رانا تنویر حسین، وزیرِاعظم کے مشیر محمد علی، وزرائے مملکت بلال اظہر کیانی اور عبد الرحمن کانجو، معاون خصوصی ہارون اختر، گورنر اسٹیٹ بینک جمیل احمد، چیف کوآرڈینیٹر مشرف زیدی سمیت دیگر اعلیٰ حکام شریک تھے۔
