نیویارک: ایران کے صدر مسعود پزشکیان نے بدھ کے روز پاکستان اور سعودی عرب کے درمیان حالیہ دفاعی معاہدے کا خیرمقدم کیا اور کہا کہ یہ قدم مسلم ممالک کے درمیان ایک جامع علاقائی سیکیورٹی فریم ورک کی تشکیل کی سمت اہم پیشرفت ہے۔ اقوام متحدہ کی جنرل اسمبلی سے خطاب کرتے ہوئے انہوں نے ایک بار پھر واضح کیا کہ ایران نے کبھی ایٹمی ہتھیار بنانے کی کوشش نہیں کی اور نہ ہی آئندہ کرے گا۔
ایرانی صدر نے اسرائیل اور امریکا پر سخت تنقید کی اور دونوں کو غزہ میں بچوں کے قتل عام، بھوک اور خطے کے کئی ممالک کی خودمختاری کی خلاف ورزی کا ذمہ دار قرار دیا۔ انہوں نے سوال اٹھایا کہ “اصل میں علاقائی اور عالمی امن کے لیے خطرہ کون ہے؟”
ایرانی خبر رساں ادارے ایرنا کے مطابق، پزشکیان نے پاک-سعودی دفاعی معاہدے کو سیاسی، سیکیورٹی اور دفاعی شعبوں میں مغربی ایشیائی مسلم ممالک کے درمیان تعاون کو فروغ دینے کی جانب ایک اہم سنگ میل قرار دیا۔ ان کا یہ بیان ایسے وقت میں سامنے آیا جب چند ماہ قبل ایران پر امریکا اور اسرائیل نے فوجی حملے کیے تھے، اور یورپی طاقتیں تہران کے جوہری پروگرام پر نئی پابندیوں کی دھمکیاں دے رہی ہیں۔
پزشکیان نے اپنے خطاب میں کہا: “میں ایک بار پھر اس ایوان کے سامنے اعلان کرتا ہوں کہ ایران نے کبھی ایٹم بم بنانے کی کوشش نہیں کی اور نہ ہی کبھی کرے گا۔ اصل میں خطے کے امن کو خطرہ اسرائیل سے ہے، لیکن سزا ایران کو دی جاتی ہے۔”
انہوں نے یورپی ممالک پر بھی الزام عائد کیا کہ وہ ایران کے ساتھ “بدنیتی” سے پیش آئے اور 2015 کے جوہری معاہدے (JCPOA) کے حوالے سے اپنی ذمہ داریاں پوری نہیں کیں۔ ان کے مطابق یہ سب واشنگٹن کے معاہدے سے نکلنے کے بعد ہوا۔ “یورپی طاقتوں نے خود کو معاہدے کے وفادار فریق کے طور پر پیش کیا، لیکن ایران کی خالص کوششوں کو ناکافی قرار دے کر اسے سبوتاژ کیا،” انہوں نے کہا۔
پزشکیان نے اپنی تقریر کے دوران ان ایرانی شہریوں کی تصاویر بھی دکھائیں جو جون میں اسرائیلی حملے میں مارے گئے تھے۔ انہوں نے اس حملے کو “بے رحمانہ” قرار دیتے ہوئے کہا: “صیہونی حکومت اور امریکا کی جانب سے ایران کے شہروں اور بنیادی ڈھانچے پر فضائی حملے، ایسے وقت میں جب ہم مذاکرات کی راہ پر تھے، سفارتکاری سے سنگین غداری تھے۔”
انہوں نے الزام لگایا کہ امریکا خطے میں غزہ کی تباہی، لبنان کی خودمختاری کی خلاف ورزی، شام کی بربادی اور یمن پر حملوں جیسے جرائم کو “خود دفاع” کے نام پر جواز فراہم کرتا ہے۔ ان کا کہنا تھا کہ ان خلاف ورزیوں کو نظرانداز کرنا خطرناک نظیر قائم کرے گا، جس میں جوہری تنصیبات پر حملے، ریاستی سربراہوں پر قاتلانہ حملے اور ماہرین کو صرف ان کے علم کی بنیاد پر نشانہ بنانا شامل ہو سکتا ہے۔
ایرانی صدر نے برطانیہ، فرانس اور جرمنی کو بھی ہدف تنقید بنایا اور کہا کہ وہ امریکی دباؤ کے آگے جھک گئے ہیں اور اب منسوخ شدہ سلامتی کونسل کی قراردادیں دوبارہ نافذ کرنے کی کوشش کر رہے ہیں۔ انہوں نے قطر کے خلاف اسرائیل کی “مجرمانہ جارحیت” کی بھی مذمت کی جس میں فلسطینی اور قطری شہری ہلاک ہوئے، اور قطر کے ساتھ یکجہتی کا اظہار کیا۔
پزشکیان نے عالمی برادری پر زور دیا کہ بین الاقوامی اداروں اور قوانین کی ساکھ بحال کی جائے اور مغربی ایشیا میں علاقائی تعاون اور سیکیورٹی کا نظام قائم کیا جائے۔ انہوں نے اپنی تقریر کے اختتام پر کہا کہ دنیا کو چاہیے کہ “خطرات کو مواقع میں بدلنے” کے لیے عملی اقدامات کرے اور حقیقی امن کے فریم ورک کی طرف بڑھے۔
