کراچی:
کراچی واٹر اینڈ سیوریج کارپوریشن (KWSC) نے شہر کے کے-ٹو پمپنگ اسٹیشن پر 48 انچ قطر کی پانی کی مرکزی لائن کی فوری مرمت کا کام شروع کر دیا ہے، جس کے باعث شہر کے کئی علاقوں میں پانی کی فراہمی عارضی طور پر متاثر ہونے کا امکان ہے۔
کارپوریشن کے ترجمان نے منگل کے روز جاری بیان میں بتایا کہ مرمتی کام کے دوران لائن پر نصب اہم والو کو بھی تبدیل کیا جا رہا ہے۔ کام چوبیس گھنٹے کی شفٹوں میں بلا تعطل جاری ہے اور توقع ہے کہ یہ عمل اگلے 48 گھنٹوں میں مکمل کر لیا جائے گا۔
ترجمان کے مطابق، مرمت کے دوران شمال مشرقی پمپنگ اسٹیشن کے 11 میں سے 3 پمپ عارضی طور پر بند کر دیے گئے ہیں، جبکہ دھابیجی پمپنگ اسٹیشن کا ایک پمپ بھی عارضی طور پر بند کر دیا گیا ہے۔
ان مرمتی کاموں کے باعث صفورہ ٹاؤن، نارتھ ناظم آباد اور گلبرگ ٹاؤن کے بعض علاقوں میں پانی کی فراہمی متاثر ہوگی۔ اسی طرح لیاقت آباد ٹاؤن اور گلشنِ اقبال کے کچھ حصوں میں بھی پانی کی فراہمی میں رکاوٹ کا سامنا رہے گا۔
کراچی کو یومیہ تقریباً 650 ملین گیلن پانی فراہم کیا جاتا ہے، تاہم مرمت کے دوران شہر کو 150 ملین گیلن یومیہ (MGD) پانی کی کمی کا سامنا ہوگا، جبکہ بقیہ 500 MGD سپلائی معمول کے مطابق جاری رہے گی۔
واٹر بورڈ نے شہریوں سے اپیل کی ہے کہ وہ پانی ذخیرہ کرلیں اور استعمال میں احتیاط سے کام لیں۔ ترجمان نے شہریوں سے ہونے والی تکلیف پر معذرت کرتے ہوئے کہا کہ یہ مرمتی کام مستقبل میں پانی کی فراہمی کے نظام کو مزید بہتر اور مستحکم بنانے کے لیے ناگزیر ہے۔
