کراچی:
اتوار کی دوپہر کالا پل کے قریب ایک تیز رفتار واٹر ٹینکر نے موٹر سائیکل کو ٹکر مار دی، جس کے نتیجے میں دو نوعمر کزن جاں بحق ہوگئے۔ اس افسوسناک حادثے کے بعد علاقے میں شدید غم و غصہ پھیل گیا اور مشتعل ہجوم نے واٹر ٹینکر کو آگ لگا دی۔
ڈی آئی جی ساؤتھ سید اسد رضا کے مطابق حادثہ مین کورنگی روڈ پر دوپہر ساڑھے تین بجے پیش آیا۔ تین کزن ایک موٹر سائیکل پر سوار تھے کہ اچانک تیز رفتار ٹینکر نے انہیں ٹکر مار کر کچل دیا۔ متاثرین کو رکشے کے ذریعے جناح پوسٹ گریجویٹ میڈیکل سینٹر پہنچایا گیا، جہاں ڈاکٹروں نے 15 سالہ ایان افضل شاہ اور 13 سالہ توسیف سہیل شاہ کو مردہ قرار دے دیا۔ تیسرے کزن کو معجزانہ طور پر کوئی بڑی چوٹ نہیں آئی۔
عینی شاہدین کا کہنا تھا کہ حادثے کے فوراً بعد جب ڈرائیور موقع سے فرار ہونے کی کوشش کر رہا تھا تو موٹر سائیکل سواروں نے اس کا تعاقب کیا، تاہم وہ ٹینکر چھوڑ کر فرار ہونے میں کامیاب ہوگیا۔
واقعے کے بعد اہل علاقہ اور راہگیر بڑی تعداد میں جمع ہوگئے اور لڑکوں کی ہلاکت پر شدید غصے کا اظہار کرتے ہوئے ٹینکر کو آگ لگا دی۔
پولیس کا کہنا ہے کہ بعد ازاں ٹینکر کو نذر آتش کرنے میں مبینہ طور پر ملوث کچھ افراد کو حراست میں لے لیا گیا۔ ڈیفنس ایس ایچ او حکم داد نے بتایا کہ پولیس نے ٹینکر کے مالک سے رابطہ کیا ہے جس نے یقین دہانی کروائی ہے کہ حادثے کے ذمہ دار ڈرائیور کو پولیس کے حوالے کردیا جائے گا۔ میڈیکو لیگل کارروائی مکمل ہونے کے بعد لاشوں کو کورنگی کی بلال کالونی میں واقع ان کے گھر منتقل کردیا گیا، جہاں تدفین کی تیاریاں غم اور دکھ کی کیفیت میں جاری تھیں
