ویب ڈیسک: کراچی کے صنعتی علاقے سائٹ میں والیکا چورنگی کے قریب واقع گدوں کے ایک گودام میں پیر کی شام اچانک آگ بھڑک اٹھی، جس کے بعد ریسکیو ٹیمیں اور فائر بریگیڈ کے عملے نے فوری طور پر موقع پر پہنچ کر کارروائی شروع کر دی۔
عینی شاہدین کے مطابق، آگ لگنے کے بعد فضا میں دھوئیں کے گہرے بادل اٹھنے لگے جبکہ فائر بریگیڈ کی کم از کم سات گاڑیاں آگ پر قابو پانے میں مصروف رہیں۔ شعلے تیزی سے گودام کے مختلف حصوں تک پھیل گئے جس کے باعث امدادی کارروائیوں میں مشکلات کا سامنا رہا۔
فائر بریگیڈ کے ترجمان نے بتایا کہ آگ لگنے کی وجوہات فی الحال معلوم نہیں ہو سکیں، تاہم تحقیقات کا آغاز کر دیا گیا ہے۔ ترجمان کے مطابق، "ہماری ٹیمیں پوری کوشش کر رہی ہیں کہ آگ پر جلد از جلد قابو پایا جا سکے۔ خوش قسمتی سے کسی جانی نقصان کی اطلاع نہیں ملی۔”
یہ امر قابلِ تشویش ہے کہ کراچی کے صنعتی علاقوں، خصوصاً سائٹ اور کورنگی زون میں، فیکٹریوں اور گوداموں میں آگ لگنے کے واقعات میں خطرناک حد تک اضافہ دیکھنے میں آ رہا ہے۔ ماہرین کا کہنا ہے کہ بیشتر عمارتوں میں مناسب فائر سیفٹی انتظامات موجود نہیں، جس سے مزدوروں اور قریبی رہائشیوں کی زندگیاں خطرے میں رہتی ہیں۔
انتظامیہ نے فیکٹری مالکان اور صنعتی اداروں کو ہدایت کی ہے کہ وہ حفاظتی اصولوں پر سختی سے عمل درآمد یقینی بنائیں تاکہ مستقبل میں اس نوعیت کے افسوسناک واقعات سے بچا جا سکے۔ دوسری جانب، والیکا چورنگی کے قریب گودام میں ٹھنڈا کرنے (cooling) کا عمل خبر فائل ہونے تک جاری تھا۔
