کراچی: گلستانِ جوہر میں دن دیہاڑے ہونے والی ایک حیران کن واردات میں دو گھریلو ملازماؤں نے مبینہ طور پر 3 کروڑ روپے مالیت کا سونا اور نقدی چوری کر لی، جبکہ گھر میں موجود ماں اور بیٹی کو یرغمال بنا کر لوٹ مار کی گئی۔
پولیس کے مطابق واقعہ گلستانِ جوہر کے بلاک 15 میں پیش آیا، جہاں دو گھریلو ملازماؤں نے اپنے تین مسلح ساتھیوں کی مدد سے انتہائی منصوبہ بندی کے ساتھ ڈکیتی کی۔ ملزماؤں نے روزمرہ کے کام کا بہانہ بنا کر گھر میں داخل ہونے کے بعد اہلِ خانہ پر قابو پا لیا۔
پولیس حکام کا کہنا ہے کہ مسلح افراد نے ماں اور بیٹی کو تشدد کا نشانہ بنایا اور انہیں باندھنے کے بعد 79 تولہ سونا، ملکی و غیر ملکی کرنسی لوٹ کر موقع سے فرار ہو گئے۔ واردات کے بعد متاثرہ خواتین شدید خوفزدہ حالت میں پائی گئیں۔
پولیس نے شبہ کی بنیاد پر ایک گھریلو ملازمہ کو حراست میں لے لیا ہے، جبکہ دیگر مفرور ملزمان کی گرفتاری کے لیے سرچ آپریشن جاری ہے۔ پولیس ترجمان کے مطابق، "واقعے کے تمام پہلوؤں پر تحقیقات کی جا رہی ہیں اور امید ہے کہ جلد ہی ملزمان قانون کی گرفت میں ہوں گے۔”
ابتدائی تحقیقات سے معلوم ہوا ہے کہ یہ واردات اندرونی معلومات کی بنیاد پر کی گئی، کیونکہ ملزمان کو گھر اور قیمتی اشیاء کے بارے میں مکمل علم تھا۔ تفتیش کاروں کا کہنا ہے کہ گھریلو ملازماؤں نے واردات کی منصوبہ بندی میں مرکزی کردار ادا کیا۔
اس افسوسناک واقعے نے کراچی میں گھریلو ملازمین کی تصدیق کے بغیر تقرری کے بڑھتے ہوئے رجحان پر ایک بار پھر سوالات اٹھا دیے ہیں، کیونکہ حالیہ مہینوں میں شہر بھر میں اس نوعیت کی متعدد وارداتیں رپورٹ ہو چکی ہیں۔
