کراچی – 31 جولائی 2025:
کراچی میں ڈکیتی کی ایک اور بڑی واردات کے دوران نامعلوم مسلح افراد نے کورنگی کے علاقے میں دن دہاڑے ایک کیش وین پر حملہ کر کے 9 کروڑ 70 لاکھ روپے لوٹ لیے اور فرار ہو گئے۔
پولیس ذرائع کے مطابق یہ واقعہ چمڑا چورنگی، کورنگی کے قریب پیش آیا، جہاں ایک نجی کیش وین جو قریبی بینک سے رقم لے کر روانہ ہوئی تھی، اچانک حملے کا نشانہ بنی۔ مسلح افراد نے گاڑی کو روک کر اندھا دھند فائرنگ کی، اور مزاحمت پر سیکیورٹی گارڈز کو گولیاں مار دیں، بعد ازاں رقم لے کر فرار ہو گئے۔
فائرنگ کے نتیجے میں دو سیکیورٹی گارڈز زخمی ہوئے جنہیں فوری طور پر قریبی اسپتال منتقل کیا گیا۔ حکام کے مطابق دونوں کی حالت خطرے سے باہر ہے۔
موقع پر موجود ایس ایس پی کورنگی طارق نواز نے میڈیا سے بات کرتے ہوئے تصدیق کی کہ واقعے میں تین سے چار مسلح ملزمان ملوث تھے۔ انہوں نے بتایا، "ابتدائی تحقیقات سے معلوم ہوتا ہے کہ ملزمان مکمل منصوبہ بندی کے ساتھ آئے تھے اور ان کے پاس جدید اسلحہ موجود تھا۔ سیکیورٹی گارڈز کی مزاحمت پر انہوں نے فائرنگ کر دی۔”
ایس ایس پی کے مطابق، علاقے میں موجود بینک اور قریبی دکانوں کے سی سی ٹی وی کیمروں کی فوٹیج حاصل کی جا رہی ہے تاکہ ملزمان کی شناخت اور ممکنہ فرار کی راہ کا پتہ لگایا جا سکے۔
پولیس کا کہنا ہے کہ کیش وین بینک سے رقم لے کر کمپنی کے ہیڈ آفس جا رہی تھی، جب حملہ ہوا۔ ملزمان کے فرار کے دوران عوامی کالونی پولیس سے مختصر جھڑپ بھی ہوئی، تاہم وہ فرار ہونے میں کامیاب ہو گئے۔
یہ واقعہ کراچی میں بڑھتے ہوئے جرائم، بالخصوص مالیاتی اداروں اور کاروباری افراد کی سیکیورٹی پر ایک بار پھر سوالیہ نشان بن کر سامنے آیا ہے۔
یاد رہے کہ اسی ماہ پی ای سی ایچ ایس کے علاقے میں ایک معروف کار ڈیلر کے گھر پر بھی ڈکیتی کی واردات ہوئی تھی، جس میں 13 کروڑ روپے مالیت کی نقدی اور قیمتی سامان لوٹا گیا۔ اس کیس نے اس وقت نیا موڑ لیا جب انکشاف ہوا کہ واردات میں مبینہ طور پر پانچ بہن بھائی، جن میں ایک مشہور ٹک ٹاکر بھی شامل ہے، ملوث ہیں۔ تاہم اب تک چوری شدہ رقم، سامان یا گاڑی کا سراغ نہیں لگایا جا سکا۔
اسی طرح، مارچ 2025 میں نیشنل ہائی وے لنک روڈ پر قائم ٹول پلازہ پر پولیس وردی میں ملبوس ڈاکوؤں نے حملہ کر کے عملے کو یرغمال بنایا، 10 لاکھ روپے اور سرکاری اسلحہ لوٹ کر فرار ہو گئے۔ اس کیس کی ایف آئی آر اسٹیل ٹاؤن تھانے میں درج کی گئی، لیکن اب تک کوئی گرفتاری عمل میں نہیں آئی۔ پولیس حکام کا کہنا ہے کہ کیش وینز کی سیکیورٹی سخت کرنے اور حالیہ وارداتوں کی تفتیش میں تیزی لانے کے لیے فوری اقدامات کیے جا رہے ہیں
