لاہور: وفاقی وزیرِ داخلہ اور پاکستان کرکٹ بورڈ (پی سی بی) کے چیئرمین محسن نقوی نے پیر کے روز قومی ہاکی ٹیم کو اپنی مکمل حمایت کی یقین دہانی کراتے ہوئے کہا ہے کہ پاکستان کی فیڈریشن آف انٹرنیشنل ہاکی (FIH) پرو لیگ میں شرکت کے تمام رکاوٹیں فوری طور پر دور کی جائیں گی۔
قومی ٹیم کے کپتان عماد بٹ سے ملاقات کے دوران محسن نقوی کو کھلاڑیوں کی فلاح، کھیل کی بحالی اور پرو لیگ کی تیاریوں سے متعلق درپیش مسائل سے آگاہ کیا گیا۔ اس موقع پر محسن نقوی نے کہا کہ پرو لیگ میں پاکستان کی شمولیت قومی اعزاز کی بات ہے اور وہ ذاتی طور پر ٹیم کی شرکت کو یقینی بنانے کے لیے ہر ممکن اقدام کریں گے۔
پی سی بی چیئرمین نے ہر کھلاڑی کے لیے دس لاکھ روپے انعام کا اعلان کرتے ہوئے یقین دلایا کہ ویزوں سے متعلق کسی بھی رکاوٹ کو فوری طور پر حل کیا جائے گا۔ انہوں نے مزید بتایا کہ پی سی بی کا پروفیشنل میڈیکل پینل کھلاڑیوں کی فٹنس اور صحت کی نگرانی کرے گا جبکہ لاجسٹکس ٹیم سفر اور دیگر انتظامات کی ذمہ داری سنبھالے گی۔
اس موقع پر کپتان عماد بٹ نے محسن نقوی کو نشانِ امتیاز حاصل کرنے پر مبارکباد بھی دی اور قومی کھیل کے فروغ کے لیے ان کی کوششوں کو سراہا۔
دوسری جانب پاکستان ہاکی فیڈریشن (پی ایچ ایف) پہلے ہی یہ تجویز دے چکی ہے کہ پرو لیگ کے لیے مختص فنڈز براہِ راست حکومت اور پاکستان اسپورٹس بورڈ (پی ایس بی) کے ذریعے خرچ کیے جائیں، بجائے اس کے کہ یہ رقم فیڈریشن کو دی جائے۔ کراچی میں میڈیا سے گفتگو کرتے ہوئے سیکریٹری پی ایچ ایف رانا مجاہد نے واضح کیا کہ پرو لیگ کے انعقاد کے لیے تقریباً 70 کروڑ روپے درکار ہیں اور فیڈریشن ان رقوم پر براہِ راست اختیار نہیں چاہتی۔
ان کا کہنا تھا: "اصل بات یہ نہیں کہ رقم کس کے ذریعے خرچ ہوتی ہے، پی ایچ ایف یا پی ایس بی کے ذریعے، بلکہ یہ ہے کہ پاکستان کی پرو لیگ میں شرکت یقینی بنے، جو قومی کھیل کی بحالی کے لیے ناگزیر ہے۔” انہوں نے زور دیا کہ کھلاڑیوں کے یومیہ الاؤنسز براہِ راست انہیں ادا کیے جائیں جبکہ پی ایس بی ٹکٹوں اور ہوٹلوں سمیت تمام انتظامات کی ذمہ داری سنبھالے۔
پی ایچ ایف کے مطابق پرو لیگ میں شمولیت سے نہ صرف کھلاڑیوں کی صلاحیتیں نکھریں گی بلکہ عالمی درجہ بندی میں بھی بہتری آئے گی۔ اس سے قبل پی ایچ ایف کے صدر طارق بگٹی نے تصدیق کی تھی کہ فیڈریشن نے انٹرنیشنل ہاکی فیڈریشن (FIH) سے شرکت کی حتمی تاریخ میں توسیع کی درخواست کی ہے۔
یاد رہے کہ گزشتہ ماہ نیوزی لینڈ نے نیشنز کپ جیتنے کے باوجود ٹورنامنٹ سے دستبرداری اختیار کر لی تھی جس کے بعد ایف آئی ایچ نے پاکستان کو پرو لیگ میں شرکت کی دعوت دی۔ تاہم پاکستان کو اپنی شرکت کی باضابطہ تصدیق کے لیے 12 اگست کی ڈیڈ لائن دی گئی تھی۔
