راولپنڈی: پاکستان انٹرنیشنل ایئرلائنز (پی آئی اے) نے پیرس کے لیے اپنی پروازوں میں کمی کا اعلان کیا ہے اور اس فیصلے کے تحت لاہور سے براہِ راست پروازیں بند کردی جائیں گی۔ ایئرلائن کا کہنا ہے کہ یہ قدم مسافروں کی کم تعداد کے باعث اٹھایا گیا ہے۔
پی آئی اے کے ترجمان کے مطابق اسلام آباد سے پیرس جانے والی پروازیں معمول کے مطابق جاری رہیں گی، تاہم لاہور سے پیرس کے لیے آخری دو پروازیں 12 اور 17 ستمبر کو روانہ ہوں گی۔
قابلِ ذکر ہے کہ پی آئی اے نے جون میں لاہور سے پیرس براہِ راست سروس کا آغاز کیا تھا، جو ہفتے میں دو بار چلائی جاتی تھی، لیکن خاطر خواہ مسافروں کی عدم دلچسپی کے باعث اب اس سلسلے کو ختم کیا جا رہا ہے۔
ترجمان نے مزید بتایا کہ قومی ایئرلائن نے دو طیاروں کی تزئین و آرائش کا عمل بھی شروع کردیا ہے تاکہ برطانیہ کے شہر مانچسٹر کے لیے پروازوں کی بحالی ممکن بنائی جا سکے۔ لاہور–پیرس روٹ سے ہٹائے جانے والے طیارے اسی مقصد کے لیے استعمال ہوں گے۔
پی آئی اے کو توقع ہے کہ ستمبر کے وسط تک "تھرڈ کنٹری آپریٹر” کی منظوری مل جائے گی، جو برطانیہ کے لیے پروازیں چلانے کی بنیادی شرط ہے۔ اس کے بعد ایئرلائن مانچسٹر کے لیے آپریشنز شروع کرنے کا ارادہ رکھتی ہے۔ یاد رہے کہ گزشتہ سال نومبر میں یورپی یونین ایوی ایشن سیفٹی ایجنسی نے پی آئی اے پر یورپ میں عائد پابندی ختم کر دی تھی، جس کے بعد قومی ایئرلائن کئی برس بعد دوبارہ یورپی روٹس پر پروازوں کے قابل ہوئی تھی
