سکردو – پاک فوج نے دیوسائی اور بابوسر کے علاقوں میں پھنسے سیاحوں کو بچانے کے لیے ہیلی کاپٹر کے ذریعے ریسکیو مشن شروع کر دیا ہے۔ ہیلی کاپٹر کے ذریعے سیاحوں کو محفوظ مقامات پر منتقل کیا جا رہا ہے جبکہ فوجی انجینئر بلاک شدہ سڑکوں کو کھولنے میں مصروف ہیں۔
لینڈ سلائیڈنگ کے باعث بند ہونے والی سکردو روڈ کی بحالی پر فوج کی ٹیمیں کام کر رہی ہیں۔ سکردو سے سادپارہ ماؤنٹینیئرنگ اسکول کے درمیان متاثرہ راستہ کلیئر کر دیا گیا ہے، جبکہ دیوسائی سے سادپارہ گاؤں تک کی سڑک بھی دوبارہ کھول دی گئی ہے۔
پاک فوج متاثرہ علاقوں میں پھنسے سیاحوں کو کھانا اور دیگر ضروری سامان بھی فراہم کر رہی ہے۔ تقریباً 150 تیار کھانے کے پیکٹ ہیلی کاپٹرز کے ذریعے پہنچا دیے گئے ہیں۔
بابوسر روڈ پر پھنسے ہوئے مسافروں کو بھی محفوظ مقامات پر منتقل کیا گیا ہے۔ اب تک 15 ہیلی کاپٹر مشن مکمل کیے جا چکے ہیں۔
پاک فوج اور گلگت بلتستان اسکاؤٹس کے اہلکار موقع پر موجود ہیں، جو زخمیوں کو طبی امداد اور متاثرین کو خوراک فراہم کر رہے ہیں۔ بھاری مشینری کے ذریعے راستوں سے ملبہ ہٹانے کا کام دن رات جاری ہے۔
بابوسر روڈ اور قراقرم ہائی وے کو کھولنے کے لیے کوششیں جاری ہیں، جبکہ دشوار گزار پہاڑی علاقوں میں لاپتہ افراد کی تلاش کے لیے ریسکیو ٹیمیں روانہ کر دی گئی ہیں۔
فوج اور ریسکیو عملے کی بروقت کارروائی اور پیشہ ورانہ مہارت کی بدولت کئی جانیں بچائی جا چکی ہیں۔ عوام کو سختی سے ہدایت کی گئی ہے کہ وہ متاثرہ علاقوں کا سفر کرنے سے گریز کریں۔
