ترجمان دفتر خارجہ کا بھارتی ’ایٹمی بلیک میلنگ‘ کے دعوے کو گمراہ کن اور سیاسی مفادات پر مبنی قرار
اسلام آباد – پاکستان نے پیر کے روز بھارت کی وزارتِ خارجہ کے حالیہ بیان کو، جس میں چیف آف آرمی اسٹاف فیلڈ مارشل عاصم منیر سے منسوب تبصرے پر ردعمل دیا گیا تھا، ’’نابالغانہ‘‘ اور ’’حقائق کو مسخ کرنے‘‘ کے مترادف قرار دیتے ہوئے سختی سے مسترد کر دیا۔
دفتر خارجہ نے اپنے دوٹوک ردعمل میں کہا کہ نئی دہلی کی یہ کوشش کہ پاکستان کے مؤقف کو ’’ایٹمی بلیک میلنگ‘‘ کے طور پر پیش کیا جائے، ’’گمراہ کن اور خود ساختہ بیانیہ‘‘ ہے جو اپنے جارحانہ رویے سے توجہ ہٹانے کے لیے تیار کیا گیا ہے۔
ترجمان دفتر خارجہ نے کہا، ’’بھارت جب بھی چیلنج کا سامنا کرتا ہے تو تلواریں لہرانے اور جنگی جنون کے ساتھ بے بنیاد الزامات عائد کرتا ہے، جن کی کوئی عقلی بنیاد نہیں ہوتی۔‘‘
بیان میں واضح کیا گیا کہ پاکستان ایک ’’ذمہ دار ایٹمی طاقت‘‘ ہے، جس کا جامع کمانڈ اینڈ کنٹرول نظام مکمل سول نگرانی میں کام کرتا ہے، اور اسلام آباد نے ہمیشہ حساس سکیورٹی معاملات میں ’’ضبط و تحمل‘‘ کا مظاہرہ کیا ہے۔
دفتر خارجہ نے پاکستان کے انسداد دہشت گردی کے ریکارڈ پر بھارتی ’’من گھڑت اشاروں‘‘ کو بھی مسترد کرتے ہوئے کہا کہ ملک کی ’’مسلسل اور قابلِ اعتبار‘‘ کوششوں کو عالمی سطح پر تسلیم کیا گیا ہے، اور اس کی سکیورٹی فورسز ’’دہشت گردی کے خلاف پہلی دفاعی دیوار‘‘ ہیں۔ ترجمان نے بھارتی وزارتِ خارجہ کی جانب سے ’’تیسرے ممالک‘‘ کا حوالہ دینے پر بھی تشویش کا اظہار کیا، اسے ’’دیگر ریاستوں کو معاملے میں گھسیٹنے کی لاحاصل کوشش‘‘ اور بھارت کے ’’سفارتی اعتماد کی کمی‘‘ کی علامت قرار دیا
