کراچی: ملک بھر میں سونے کی قیمت میں منگل کے روز ایک بار پھر کمی ریکارڈ کی گئی، جس سے قیمتی دھات کی قدر میں مزید گراوٹ آئی ہے۔
آل پاکستان جیمز اینڈ جیولرز ایسوسی ایشن کے مطابق 24 قیراط سونے کی فی تولہ قیمت 500 روپے کمی کے بعد 3 لاکھ 58 ہزار 300 روپے ہوگئی۔ اسی طرح 10 گرام سونے کی قیمت 429 روپے کمی کے بعد 3 لاکھ 7 ہزار 184 روپے ریکارڈ کی گئی۔
عالمی منڈی میں بھی سونے کی قیمت میں معمولی کمی آئی، جہاں فی اونس نرخ 5 ڈالر کم ہو کر 3 ہزار 356 ڈالر پر آ گئے۔
سونا طویل عرصے سے ایک محفوظ سرمایہ کاری کے طور پر جانا جاتا ہے، جو مہنگائی، سیاسی عدم استحکام یا معاشی غیر یقینی حالات میں عموماً اپنی قدر میں اضافہ کرتا ہے۔ صدیوں سے یہ دولت محفوظ رکھنے اور کرنسی کے طور پر استعمال ہونے والا اثاثہ رہا ہے، اور آج بھی جب سرمایہ کار دیگر ذرائع پر اعتماد کھو دیتے ہیں تو وہ سونے کا رخ کرتے ہیں۔
یہ امر قابلِ ذکر ہے کہ گزشتہ سال پاکستان میں سونے کی قیمت طے کرنے کا طریقہ کار تبدیل کیا گیا تھا۔ نئے فارمولے کے تحت، مقامی مارکیٹ میں سونے کا نرخ عالمی قیمت سے فی اونس 20 ڈالر زیادہ مقرر کیا جاتا ہے۔
