سرینگر: ماہرین صحت نے نوجوانوں میں ذیابیطس کے بڑھتے ہوئے کیسز پر گہری تشویش کا اظہار کیا ہے، اور خبردار کیا ہے کہ یہ بیماری دل کے امراض اور وقت سے پہلے اموات کی ایک بڑی وجہ بن رہی ہے۔
سال 2000 سے 2020 تک کی گئی ایک طویل تحقیق میں 5 لاکھ 9 ہزار سے زائد افراد کا تجزیہ کیا گیا۔ ان میں سے 1,000 سے زائد نوجوان ایسے تھے جنہیں ذیابیطس لاحق ہوئی، اور بعد میں انہیں شدید دل کی بیماریاں لاحق ہو گئیں۔
تحقیق سے معلوم ہوا کہ جموں و کشمیر میں دل کی بیماریاں اب اموات کی سب سے بڑی وجہ بن چکی ہیں، خاص طور پر 25 سے 69 سال کی عمر کے افراد میں۔
ماہرین نے اس تشویشناک رجحان کو انسولین کی کمی، غیر متوازن خوراک، تمباکو نوشی، فاسٹ فوڈ کے زیادہ استعمال اور موٹاپے سے جوڑا ہے۔
گورنمنٹ میڈیکل کالج سرینگر کے شعبہ امراض قلب کے سربراہ ڈاکٹر خالد محی الدین کے مطابق، ذیابیطس کی وجہ سے خون میں شوگر کی زیادتی اعصابی نظام کو نقصان پہنچاتی ہے، جس کے نتیجے میں گردوں اور دل کی بیماریاں پیدا ہوتی ہیں۔
ڈاکٹر خالد نے خاص طور پر کشمیر میں ذیابیطس کے کنٹرول کو ترجیح دینے کی ضرورت پر زور دیا، جہاں "کورونری آرٹری ڈیزیز” (CAD) تیزی سے پھیل رہی ہے۔
حالیہ برسوں میں کشمیر میں 30 سے زائد افراد دل کے دوروں کے باعث جان کی بازی ہار چکے ہیں، جن میں سے زیادہ تر نوجوان تھے اور انہیں ذیابیطس و دل کے امراض کا خطرہ لاحق تھا جو بروقت کنٹرول نہیں ہوا۔
ماہرین کے مطابق یہ مسائل غیر صحت مند طرزِ زندگی، جسمانی سرگرمیوں میں کمی اور بڑھتے ہوئے موٹاپے کے باعث مزید بگڑتے جا رہے ہیں۔ پہلے دل کے دورے صرف بڑی عمر کے افراد میں دیکھے جاتے تھے، مگر اب 30 سے 40 سال کے نوجوان بھی متاثر ہو رہے ہیں۔
ماہرین صحت عوام سے پرزور اپیل کرتے ہیں کہ وہ متوازن غذا اپنائیں، باقاعدگی سے ورزش کریں اور تمباکو نوشی سے پرہیز کریں تاکہ ذیابیطس اور دل کے امراض کے خطرات کو کم کیا جا سکے۔
دوسری جانب، امریکہ میں موٹاپے کے شکار نوجوانوں میں وزن کم کرنے والی دوا Wegovy کے استعمال میں نمایاں اضافہ دیکھنے میں آیا ہے۔ ہیلتھ ڈیٹا کمپنی Truveta کی رپورٹ کے مطابق، 2023 میں اس دوا کے استعمال میں 50 فیصد اضافہ ہوا، اور ہر ایک لاکھ امریکی نوجوانوں میں تقریباً 14.8 نسخے درج کیے گئے۔
