کراچی:
پاکستان کے کھیلوں کے منظرنامے میں ایک اہم پیش رفت کے طور پر، میکڈونلڈز پاکستان نے لیجنڈز ایرینا کے ساتھ شراکت داری کرتے ہوئے ایشیا پیسفک پیڈل ٹور (APPT) پیڈل گرانڈ سلیم 2025 کراچی میں منعقد کرنے کا اعلان کیا ہے — جو ملک کی تاریخ کا پہلا بین الاقوامی پیڈل ٹورنامنٹ ہوگا۔ اس ایونٹ کو عالمی شہرت یافتہ اسکواش لیجنڈ جہانگیر خان کی حمایت حاصل ہے، جو لیجنڈز ایرینا کے پارٹنر بھی ہیں۔
تقریبِ دستخط کے موقع پر چھ مرتبہ کے عالمی اسکواش چیمپئن جہانگیر خان نے اس ابھرتے ہوئے کھیل میں پاکستان کے امکانات پر امید کا اظہار کیا۔
انہوں نے کہا، “پاکستان نے ہمیشہ عالمی معیار کے کھلاڑی پیدا کیے ہیں، اور مجھے یقین ہے کہ پیڈل ہمارے اس شاندار سفر کا اگلا باب بن سکتا ہے۔ مقامی اور بین الاقوامی کھلاڑیوں کے درمیان مہارت کا فرق زیادہ نہیں، اور اگر مناسب مواقع فراہم کیے جائیں تو مجھے یقین ہے کہ جلد ہی پاکستانی کھلاڑی عالمی سطح پر اپنی پہچان بنائیں گے۔”
اے پی پی ٹی پیڈل گرانڈ سلیم کا مقصد پاکستان کے ابھرتے ہوئے پیڈل کھلاڑیوں کو ایک بین الاقوامی پلیٹ فارم فراہم کرنا ہے، جہاں وہ عالمی سطح کے ایتھلیٹس کے ساتھ اپنے ہی ملک میں مقابلہ کر سکیں یہ نہ صرف کھیل کی ترقی بلکہ اس کی مقبولیت میں بھی ایک بڑا سنگ میل ثابت ہوگا۔
میکڈونلڈز پاکستان کے منیجنگ ڈائریکٹر جمیل مغل نے اس موقع پر کہا، “ہمیں فخر ہے کہ ہم لیجنڈز ایرینا کے ساتھ مل کر پاکستان کا پہلا بین الاقوامی پیڈل ٹورنامنٹ لے کر آ رہے ہیں۔ یہ شراکت داری ہماری اس کوشش کا تسلسل ہے جس کے ذریعے ہم صحت مند طرزِ زندگی، کھیلوں کی ترویج اور کمیونٹی انگیجمنٹ کو فروغ دینا چاہتے ہیں۔”
اس موقع پر میکڈونلڈز پاکستان اور لیجنڈز ایرینا کے سینئر عہدیداران نے بھی شرکت کی، جس سے اس اشتراک کی اہمیت مزید اجاگر ہوئی۔ یہ اقدام لیجنڈز ایرینا کی انفراسٹرکچر میں سرمایہ کاری، کھلاڑیوں کی تربیت اور عالمی معیار کی سہولتوں کی فراہمی کے عزم کی بھی عکاسی کرتا ہے۔
اے پی پی ٹی پیڈل گرانڈ سلیم کراچی 2025 نہ صرف پاکستان کے بڑھتے ہوئے عالمی اسپورٹس کردار کی علامت ہے بلکہ یہ کارپوریٹ تعاون، ایتھلیٹک جذبے اور قومی فخر کو ایک پلیٹ فارم پر یکجا کرنے کی ایک شاندار مثال بھی ہے۔
