کراچی – 6 اگست 2025:
لیاری کے علاقے میں منگل کی شام گھریلو جھگڑے کے دوران ایک افسوسناک واقعہ پیش آیا، جس میں ایک 45 سالہ خاتون بختاور کو اس کے شوہر نواب نے فائرنگ کرکے قتل کر دیا۔ بختاور سات بچوں کی ماں تھی۔
پولیس کے مطابق، نواب کو اپنی بیوی پر شک تھا کہ وہ کسی سے فون پر بات کر رہی ہے۔ اسی شک کی بنیاد پر دونوں کے درمیان تلخ کلامی ہوئی جو بعد ازاں قتل پر منتج ہوئی۔
چاکیواڑہ تھانے کے ایس ایچ او انسپکٹر سجاد دھریجو کے مطابق، جھگڑے کے دوران نواب نے 30 بور پستول نکالا اور فائرنگ کرکے بختاور کو موقع پر ہی ہلاک کر دیا۔
واقعے کے بعد علاقے کے مکینوں نے فوری طور پر پولیس کو اطلاع دی۔ پولیس موقع پر پہنچی اور نواب کو آلہ قتل سمیت گرفتار کر لیا۔ بختاور کی لاش کو سول اسپتال کراچی منتقل کیا گیا جہاں ضابطے کی کارروائیاں مکمل کی گئیں۔
افسوسناک امر یہ ہے کہ متاثرہ خاتون کے لواحقین میں سے کوئی بھی لاش لینے کے لیے سامنے نہیں آیا، جس کے بعد اہلِ محلہ نے انسانی ہمدردی کے تحت لاش کو عارضی طور پر سرد خانے منتقل کروایا۔ پولیس کا کہنا ہے کہ واقعے کی تحقیقات قانونی دفعات کے تحت کی جا رہی ہیں، جبکہ علاقہ مکینوں نے اس اندوہناک قتل پر گہرے دکھ اور غم کا اظہار کیا ہے اور مطالبہ کیا ہے کہ گھریلو تشدد اور غیرت کے نام پر قتل جیسے واقعات کی روک تھام کے لیے سخت قانون سازی کی جائے
