راولپنڈی:
پاک فوج کے سربراہ فیلڈ مارشل سید عاصم منیر نے جمعے کے روز راولپنڈی میں چین کے وزیرِ خارجہ وانگ ای سے ملاقات کی جس میں خطے کی سلامتی، دہشت گردی کے خلاف اقدامات اور دو طرفہ تعاون کو مزید فروغ دینے کے امور پر تبادلہ خیال کیا گیا۔
پاک فوج کے شعبۂ تعلقات عامہ (آئی ایس پی آر) کے مطابق دونوں رہنماؤں نے اس عزم کا اعادہ کیا کہ پاکستان اور چین خطے میں امن، استحکام اور ترقی کے فروغ کے لیے مل کر کام کرتے رہیں گے۔ اس موقع پر دونوں ملکوں نے ’’ہمہ موسمی اسٹریٹجک شراکت داری‘‘ کو مزید مضبوط بنانے اور علاقائی و عالمی سطح پر تعاون بڑھانے پر بھی اتفاق کیا۔
ملاقات میں چینی وزیرِ خارجہ وانگ ای نے پاکستان کی خودمختاری اور ترقی کے اہداف کے لیے چین کی بھرپور حمایت کے عزم کو دوہرایا، جب کہ فیلڈ مارشل منیر نے پاکستان کے لیے چین کی مستقل سفارتی اور معاشی حمایت پر شکریہ ادا کیا۔ چینی وزیرِ خارجہ نے اپنا تین روزہ سرکاری دورہ پاکستان جمعے کے روز مکمل کیا۔ ایئرپورٹ پر ڈپٹی وزیراعظم اور وزیرِ خارجہ سینیٹر اسحاق ڈار نے انہیں رخصت کیا، اس موقع پر پاکستان کے بیجنگ میں سفیر، اسلام آباد میں تعینات چینی سفیر اور اعلیٰ سرکاری حکام بھی موجود تھے
