کراچی، 23 اگست 2025: پاکستان ایئرپورٹس اتھارٹی (PAA) نے فیصل آباد میں ایک نیا ایئرپورٹ تعمیر کرنے کا اعلان کیا ہے اور اس منصوبے کے ڈیزائن، ماسٹر پلان اور فزیبلٹی اسٹڈی کے لیے مشاورتی کمپنیوں سے تجاویز طلب کر لی ہیں۔ دلچسپی رکھنے والی کمپنیاں اپنی درخواستیں 12 اکتوبر 2025 تک جمع کرا سکیں گی۔
یہ اقدام وفاقی حکومت کی وسیع تر ہوابازی پالیسی کا حصہ ہے۔ رواں سال اپریل میں اسلام آباد نے آزاد جموں و کشمیر میں ایک بین الاقوامی ایئرپورٹ قائم کرنے کی منظوری دی تھی، جو بیرون ملک مقیم پاکستانیوں کا پرانا مطالبہ تھا۔
اس تجویز کو اس وقت مزید تقویت ملی جب کشمیری نژاد برطانوی اراکینِ پارلیمنٹ نے وزیرِاعظم شہباز شریف کو ایک خط لکھ کر اس منصوبے کو ترجیح دینے پر زور دیا۔ یہ اپیل خصوصاً اُن پاکستانیوں کے جذبات کی عکاس تھی جو برطانیہ اور آزاد کشمیر کے درمیان بار بار سفر کرتے ہیں۔
وفاقی حکومت کی ہدایات پر ایئرپورٹس اتھارٹی پہلے ہی آزاد کشمیر ایئرپورٹ منصوبے کے لیے مشاورتی خدمات فراہم کرنے والی کمپنیوں سے درخواستیں طلب کر چکی ہے۔ اب فیصل آباد کا منصوبہ بھی اسی سلسلے کی ایک کڑی سمجھا جا رہا ہے، جس کا مقصد پاکستان کے فضائی ڈھانچے کو جدید تقاضوں کے مطابق ڈھالنا اور ملکی و غیرملکی مسافروں کی بڑھتی ہوئی ضروریات کو پورا کرنا ہے۔
