اسلام آباد: نائب وزیر اعظم و وزیر خارجہ اسحاق ڈار آئندہ ہفتے امریکہ روانہ ہوں گے جہاں وہ نیویارک میں اقوام متحدہ کی سلامتی کونسل کی صدارت کے سلسلے میں منعقد ہونے والی اہم تقریبات میں شرکت کریں گے۔ دفتر خارجہ نے اتوار کو اس بات کی تصدیق کی۔
دورہ نیویارک کے دوران اسحاق ڈار اقوام متحدہ کے ہیڈکوارٹر میں متعدد اہم اجلاسوں کی صدارت کریں گے، جن میں “کثیرالجہتی اور تنازعات کے پرامن حل کے ذریعے بین الاقوامی امن و سلامتی کے فروغ” کے موضوع پر اعلیٰ سطح کا کھلا مباحثہ بھی شامل ہے۔ اس اجلاس کا مقصد عالمی تنازعات کے حل اور امن کے قیام کیلئے سفارتکاری اور ثالثی کی اہمیت کو اجاگر کرنا ہے۔
وزیر خارجہ سلامتی کونسل کے سہ ماہی کھلے مباحثے کی بھی صدارت کریں گے جس کا موضوع “مشرق وسطیٰ کی صورتحال بشمول فلسطینی مسئلہ” ہوگا۔ اس موقع پر وہ فلسطینی عوام کی حمایت اور دیگر دیرینہ عالمی تنازعات کے حل کیلئے پاکستان کے اصولی موقف کو اجاگر کریں گے۔
اس کے علاوہ ڈار ایک خصوصی بریفنگ کی صدارت بھی کریں گے جس کا مقصد اقوام متحدہ اور اسلامی تعاون تنظیم (OIC) کے درمیان تعاون کو مضبوط بنانا ہے۔ یہ اقدام پاکستان کی اس وسیع سفارتی کوشش کا حصہ ہے جس کا مقصد عالمی امن کیلئے کثیرالجہتی اداروں کے درمیان روابط کو فروغ دینا ہے۔
فلسطین سے اظہار یکجہتی کیلئے اسحاق ڈار “فلسطینی مسئلے کے پرامن حل اور دو ریاستی حل کے نفاذ” پر ہونے والی اعلیٰ سطحی کانفرنس میں بھی شرکت کریں گے۔ توقع ہے کہ اس کانفرنس میں پاکستان کی جانب سے اسرائیلی قبضے کے خاتمے اور مسئلہ فلسطین کے منصفانہ حل کا مطالبہ بھرپور انداز میں پیش کیا جائے گا۔ ان کثیرالجہتی مصروفیات کے علاوہ ڈار اپنے قیام کے دوران مختلف ممالک کے وزرائے خارجہ اور اقوام متحدہ کے اعلیٰ حکام سے دو طرفہ ملاقاتیں بھی کریں گے جن میں علاقائی اور عالمی امور پر بات چیت ہوگی۔ نیویارک میں اجلاسوں کے بعد نائب وزیر اعظم واشنگٹن بھی جائیں گے جہاں ان کی مزید سفارتی مصروفیات متوقع ہیں، تاہم اس مرحلے کے شیڈول کی تفصیلات تاحال جاری نہیں کی گئیں
