اسلام آباد – جولائی 2025
پاکستان نے عراق کے شمالی علاقے میں میتھین گیس کے سانحے میں 12 ترک فوجیوں کی ہلاکت پر ترک حکومت اور عوام سے گہرے دکھ اور افسوس کا اظہار کیا ہے۔ دفتر خارجہ کی جانب سے منگل کے روز جاری بیان میں اس سانحے پر افسوس کا اظہار کرتے ہوئے ترک عوام سے یکجہتی کا پیغام دیا گیا۔
ترک وزارتِ دفاع کے مطابق یہ واقعہ اُس وقت پیش آیا جب ترک فوجی عراق میں جاری "کلا لاک آپریشن” کے دوران ایک ایسے ساتھی فوجی کی لاش کی تلاش میں تھے جو مئی 2022 میں کرد جنگجوؤں کی فائرنگ سے شہید ہو گیا تھا اور جس کی لاش اب تک نہیں ملی تھی۔
وزارتِ دفاع نے مزید بتایا کہ واقعے کی وجوہات جاننے کے لیے ایک انتظامی تحقیق کا آغاز کر دیا گیا ہے تاکہ میتھین گیس کی موجودگی اور اس سانحے کی وجوہات کا مکمل جائزہ لیا جا سکے۔
دفتر خارجہ نے سوشل میڈیا پلیٹ فارم X (سابقہ ٹوئٹر) پر جاری بیان میں لکھا:
"ہم شہداء کے لیے اللہ تعالیٰ سے رحمت کی دعا کرتے ہیں اور سوگوار خاندانوں سے دلی ہمدردی کا اظہار کرتے ہیں۔ پاکستان اس دکھ کی گھڑی میں اپنے برادر ملک ترکی کے ساتھ بھرپور یکجہتی کا اظہار کرتا ہے۔”
پاکستان اور ترکی کے تعلقات تاریخی، ثقافتی، مذہبی اور باہمی احترام کی بنیاد پر قائم ہیں، اور دونوں ممالک نے مشکل وقت میں ایک دوسرے کا ہمیشہ ساتھ دیا ہے۔
گزشتہ ماہ بھی ترک صدر رجب طیب ایردوان نے پاکستان کے ضلع شمالی وزیرستان میں دہشت گردی کے واقعے میں 13 فوجیوں کی شہادت پر افسوس کا اظہار کیا تھا۔ انہوں نے کہا تھا:
"میں اپنے پاکستانی بھائیوں اور بہنوں کے لیے دعا گو ہوں جو اس حملے میں شہید ہوئے، اور زخمیوں کی جلد صحتیابی کی دعا کرتا ہوں۔ جیسا کہ ہمیشہ، ترکی اپنے دیرینہ دوست پاکستان کے ساتھ انسداد دہشت گردی کے محاذ پر کھڑا رہے گا۔”
فروری 2023 میں ترکی میں آنے والے ہولناک زلزلوں کے بعد، جن میں 55 ہزار سے زائد افراد جاں بحق اور ایک لاکھ سے زائد زخمی ہوئے تھے، پاکستان نے امدادی سامان، ریسکیو ٹیمیں اور ڈاکٹرز ترکی روانہ کیے تھے، جو دونوں ممالک کی گہری دوستی کی روشن مثال ہے۔
میتھین گیس کے حالیہ سانحے نے ایک بار پھر اس مضبوط تعلق کی یاد دہانی کرائی ہے، اور پاکستان نے ترکی کے ساتھ اس المیے پر گہرے رنج و غم کا اظہار کرتے ہوئے اپنی مکمل یکجہتی کا اعادہ کیا ہے۔
