دبئی، 26 ستمبر 2025 — پاکستان کے مایہ ناز فاسٹ بولر شاہین شاہ آفریدی نے ایک بار پھر اپنی میچ وننگ صلاحیتوں کا لوہا منواتے ہوئے بنگلہ دیش کے خلاف شاندار کارکردگی دکھائی اور اپنی ٹیم کو ایشیا کپ 2025 ٹی ٹوئنٹی کے فائنل میں پہنچا دیا۔
دبئی انٹرنیشنل اسٹیڈیم میں کھیلے گئے سپر فور مرحلے کے سنسنی خیز میچ میں پاکستان نے 136 رنز کا ہدف دیا، جس کے تعاقب میں بنگلہ دیش کی ٹیم مقررہ 20 اوورز میں 9 وکٹوں پر صرف 124 رنز بنا سکی۔ یوں گرین شرٹس نے 11 رنز سے کامیابی حاصل کی۔
اس اہم مقابلے میں شاہین آفریدی سب سے نمایاں رہے۔ انہوں نے صرف 17 رنز دے کر 3 کھلاڑیوں کو آؤٹ کیا اور بنگلہ دیش کی بیٹنگ لائن کو دباؤ میں ڈال دیا۔ ان کی زبردست کارکردگی پر انہیں مین آف دی میچ قرار دیا گیا، جو کہ ان کے کیریئر کا دسویں موقع ہے۔ یوں شاہین اس فارمیٹ میں سب سے تیزی سے دس بار مین آف دی میچ ایوارڈ حاصل کرنے والے بالر بن گئے۔
شاہین کی کارکردگی صرف گیند تک محدود نہیں رہی، بلکہ انہوں نے بلے سے بھی قیمتی رنز جوڑے۔ آخری اوورز میں بیٹنگ کرتے ہوئے انہوں نے 13 گیندوں پر 19 رنز بنائے، جن میں دو بلند و بالا چھکے بھی شامل تھے۔
میچ کے بعد پاکستان کرکٹ ٹیم کے ہیڈ کوچ مائیک ہیسن نے کھلاڑیوں کی ہمت اور عزم کی تعریف کی۔ ان کا کہنا تھا: "یہ ایک مشکل پچ تھی جہاں ابتدائی اوورز میں بیٹنگ آسان نہیں تھی، لیکن شاہین نے بڑی ذمہ داری سے بولنگ کی اور بہترین نتائج دیے۔”
کوچ نے مزید کہا کہ حالیہ فتوحات نے ڈریسنگ روم میں اعتماد کو بڑھایا ہے اور شاہین جیسی پرفارمنسز ظاہر کرتی ہیں کہ ٹیم بڑے امتحان کے لیے پوری طرح تیار ہے۔ "یہ زبردست جیت تھی، کھلاڑیوں کو اپنی اس جدوجہد پر فخر ہونا چاہیے،” ہیسن نے کہا۔
اس کامیابی کے ساتھ پاکستان نے ایشیا کپ کے فائنل میں جگہ بنالی ہے، جہاں تاریخ رقم ہونے جارہی ہے اور شائقین کرکٹ کو ایک یادگار مقابلے کا شدت سے انتظار ہے۔
