سیالکوٹ، 28 اگست: پنجاب کے شہر سیالکوٹ میں گزشتہ 48 گھنٹوں کے دوران ریکارڈ 512 ملی میٹر بارش ہوئی جس کے نتیجے میں شدید شہری سیلاب آیا اور معمولاتِ زندگی مفلوج ہو گئے۔
ڈپٹی کمشنر صبا اصغر کے مطابق تین بڑے نالوں میں طغیانی آنے سے شہر کے کئی علاقے زیرِ آب آ گئے۔ انہوں نے بتایا کہ "سیالکوٹ میں پہلی مرتبہ اس قدر شدید سیلاب دیکھا جا رہا ہے۔” متاثرہ علاقوں میں ریسکیو آپریشن کے لیے کشتیاں چلائی گئیں جبکہ ضلعی انتظامیہ کی جانب سے نو امدادی کیمپ قائم کیے گئے ہیں، تاہم کئی لوگ گھروں کو چھوڑنے پر آمادہ نہیں۔
افسران کے مطابق کچھ خاندان ابتدا میں کیمپوں میں منتقل ہوئے مگر بعد میں اپنے رشتہ داروں کے پاس چلے گئے۔ صبا اصغر کا کہنا تھا کہ دریائے چناب میں پانی کی سطح کچھ کم ہوئی ہے جس سے فوری خطرہ ٹل گیا ہے، تاہم گزشتہ روز شہر میں ایمرجنسی نافذ کر کے تمام اسکولز اور کالجز بند کر دیے گئے تھے۔
یہ صورتحال پنجاب کے دیگر اضلاع میں بھی سنگین شکل اختیار کر گئی ہے جہاں بھاری بارشوں اور بھارت کی جانب سے دریاؤں میں پانی چھوڑنے کے باعث اب تک 25 افراد جاں بحق ہو چکے ہیں۔ سیلابی ریلوں نے دیہات، قصبات اور شہروں کو اپنی لپیٹ میں لے رکھا ہے، اور حکام کے مطابق یہ صوبے کی حالیہ تاریخ کا بدترین سیلاب ہے۔
صرف گوجرانوالہ ڈویژن میں 15 ہلاکتیں رپورٹ ہوئیں جن میں سمبڑیال میں ایک ہی خاندان کے پانچ افراد شامل ہیں۔ اس کے علاوہ گجرات میں چار، نارووال میں تین، حافظ آباد میں دو اور گوجرانوالہ شہر میں ایک شخص جاں بحق ہوا۔ حکام نے خبردار کیا ہے کہ راوی، چناب اور ستلج کے دریاؤں میں اونچے درجے کے سیلاب کا سلسلہ تاحال جاری ہے، جس سے نشیبی علاقے بدستور خطرے کی زد میں ہیں۔
