ریاض: مذہبی سفر کو مزید آسان اور قابلِ رسائی بنانے کے لیے سعودی عرب نے اعلان کیا ہے کہ اب مملکت میں موجود ایسے تمام افراد جو کسی بھی قسم کے ویزا پر ہیں، وہ دورانِ قیام عمرہ ادا کر سکیں گے۔ یہ اعلان سعودی وزارتِ حج و عمرہ نے اتوار کے روز کیا۔
سرکاری خبر رساں ادارے سعودی پریس ایجنسی (SPA) کے مطابق، اس فیصلے کے تحت اب فیملی ویزا، ذاتی ویزا، سیاحتی ویزا، ٹرانزٹ ویزا، ورک ویزا اور دیگر اقسام کے ویزا رکھنے والے افراد کو بھی عمرہ کی ادائیگی کی اجازت ہوگی۔ وزارت نے بتایا کہ یہ اقدام حکومت کی اُن کاوشوں کا حصہ ہے جن کا مقصد زائرین کے لیے سہولت پیدا کرنا اور ویژن 2030 کے تحت مذہبی خدمات تک رسائی کو وسعت دینا ہے۔
وزارت کے بیان میں کہا گیا کہ “یہ فیصلہ مملکت کے اس عزم کی عکاسی کرتا ہے کہ وہ دنیا بھر کے مسلمانوں کو آسانی اور سکون کے ساتھ اپنے مذہبی فرائض ادا کرنے کے مواقع فراہم کرے۔”
عہدیداروں کے مطابق، یہ قدم سعودی عرب کے اس طویل المدتی منصوبے کی تکمیل کی جانب ایک اور پیش رفت ہے جس کا مقصد مذہبی سیاحت کو فروغ دینا اور جدید ڈیجیٹل نظام کے ذریعے زائرین کے تجربے کو بہتر بنانا ہے۔
ہر سال دنیا بھر سے لاکھوں مسلمان مکہ مکرمہ اور مدینہ منورہ کا رخ کرتے ہیں تاکہ حج و عمرہ کی سعادت حاصل کر سکیں، جن میں پاکستان اُن ممالک میں شامل ہے جنہیں سب سے زیادہ حج کوٹہ فراہم کیا جاتا ہے۔
اسی سال کے اوائل میں پاکستان کی وفاقی کابینہ نے حج پالیسی 2026 کی منظوری دی تھی، جس میں آئندہ حج سیزن کے لیے انتظامی، مالیاتی اور سفری سہولیات سے متعلق اقدامات شامل ہیں۔
سعودی حکومت کے اس تازہ اعلان کو عالمِ اسلام میں خوش آئند قرار دیا جا رہا ہے، کیونکہ اس سے وہ پابندی ختم ہو گئی ہے جو ماضی میں صرف مخصوص ویزا رکھنے والوں تک محدود تھی۔ یہ فیصلہ مملکت کے اُس وژن کی جانب ایک اور اہم قدم ہے جس کا مقصد مذہبی سفر کو تمام مسلمانوں کے لیے آسان، پرامن اور سہل بنانا ہے۔
