پاکستان میں رواں سال بیرونِ ملک روزگار کے رجحان میں اضافہ برقرار ہے، جہاں 2025 کے ابتدائی دس ماہ میں 6 لاکھ 15 ہزار سے زائد افراد روزگار کے سلسلے میں مختلف ممالک روانہ ہوئے۔ بیورو آف امیگریشن اینڈ اوورسیز ایمپلائمنٹ (BEOE) کے تازہ ترین اعداد و شمار بتاتے ہیں کہ اگرچہ بیرونِ ملک ملازمتوں کی مانگ بڑھ رہی ہے، لیکن ویزا جانچ، دستاویزات کی سخت جانچ پڑتال اور ایئرپورٹس پر آف لوڈنگ کے بڑھتے واقعات نے پاکستانی امیدواروں کے لیے راستہ مزید مشکل بنا دیا ہے۔
اعداد و شمار کے مطابق جنوری سے اکتوبر تک ہر ماہ اوسطاً 61 ہزار سے زائد پاکستانی بیرونِ ملک گئے۔ گزشتہ سال 2024 میں مجموعی طور پر 7 لاکھ 27 ہزار 381 افراد بیرون ملک ملازمت کے لیے گئے تھے۔
خطے میں سعودی عرب سب سے بڑی منزل رہا، جہاں اس عرصے کے دوران 4 لاکھ 31 ہزار 545 پاکستانی کارکن پہنچے۔ قطر نے 53 ہزار 103 جبکہ متحدہ عرب امارات نے 36 ہزار 433 پاکستانی کارکنوں کو ملازمت دی۔ تجزیہ کاروں کا کہنا ہے کہ خلیجی ممالک میں جاری تعمیراتی منصوبے اور ترقیاتی سرگرمیاں بیرونی افرادی قوت کی طلب کو مسلسل بڑھا رہی ہیں۔
ترقی یافتہ ممالک کی جانب ہجرت کا سلسلہ بھی برقرار رہا۔ برطانیہ نے 3,726 پاکستانیوں کو ملازمت کے مواقع فراہم کیے، جبکہ 833 افراد امریکہ پہنچے — جن میں زیادہ تر ہنر مند کارکن یا وہ گریجویٹس شامل تھے جو اعلیٰ تعلیم مکمل کرنے کے بعد پیشہ ورانہ زندگی میں داخل ہو رہے ہیں۔
دوسری جانب، سخت ہوتی ویزا جانچ نے امیدواروں کے لیے صورتحال مزید پیچیدہ بنا دی ہے۔ 2025 میں ویزا دستاویزات کی جانچ پہلے سے کہیں زیادہ سخت ہو چکی ہے اور نئے سرٹیفکیشن تقاضوں نے مشکلات میں مزید اضافہ کیا ہے، جس کے باعث بہت سے امیدوار بیرونِ ملک مواقع حاصل کرنے کے لیے بھاری قرض لینے پر مجبور ہیں۔
ایئرپورٹس پر آف لوڈنگ کے بڑھتے واقعات بھی ایک بڑا مسئلہ بن چکے ہیں، خاص طور پر نوجوان مسافروں کے ساتھ۔ اس رجحان کے باعث وہ امیدوار شدید مالی نقصان اٹھاتے ہیں جو پہلے ہی ایجنٹ فیس، میڈیکل ٹیسٹ اور مہنگے ٹکٹوں پر لاکھوں روپے خرچ کر چکے ہوتے ہیں۔ اس کے علاوہ، ہنر کی کمی اور کمزور درخواستیں بھی پاکستانی امیدواروں کی خلیجی اور یورپی مارکیٹس میں کامیابی کی راہ میں رکاوٹ بنی ہوئی ہیں۔
