]ایکشـن کے لیجنڈ جیکی چین نے انکشاف کیا ہے کہ ان کی دنیا بھر میں مشہور اسٹنٹ ٹیم مارول کی آنے والی فلم اسپائیڈر مین: برانڈ نیو ڈے کے ایکشن مناظر پر کام کر رہی ہے۔ یہ فلم اسپائیڈر مین سیریز کی چوتھی قسط ہے جس کا شائقین بے چینی سے انتظار کر رہے ہیں۔
ہانگ کانگ کے نشریاتی ادارے HK01 سے گفتگو کرتے ہوئے جیکی چین نے بتایا کہ وہ لندن گئے تھے جہاں فلم کی شوٹنگ جاری ہے اور ان کی ٹیم ایکشن کی کوریوگرافی کر رہی ہے۔ انہوں نے کہا:
“میری جیکی چین اسٹنٹ ٹیم اسپائیڈر مین کی شوٹنگ میں مصروف تھی اور میں اس ٹیم کا ایکشن ڈائریکٹر تھا۔”
تاہم انہوں نے واضح کیا کہ وہ خود فلم کا حصہ نہیں ہیں۔ جیکی چین نے مسکراتے ہوئے کہا:
“میں نے جا کر ان کی ریہرسل دیکھی اور ڈائریکٹر [ڈیسٹن ڈینیئل کریٹن] کو کافی حیرت ہوئی کہ میں سیٹ پر موجود ہوں۔ میں نے صرف یہ یقینی بنایا کہ وہ جان لیں یہ ٹیم میری ہے۔”
جیکی چین نے اسپائیڈر مین کا کردار نبھانے والے اداکار ٹام ہالینڈ کی تعریف بھی کی اور کہا کہ وہ خود بھی کئی اسٹنٹ کرتے ہیں۔ ان کے بقول:
“میں نے سنا ہے کہ اس نوجوان نے کئی ایکشن مناظر میں میری فلموں کو خراجِ تحسین پیش کیا ہے اور اپنے اسٹنٹ خود کیے ہیں۔”
اسپائیڈر مین: برانڈ نیو ڈے کی شوٹنگ اس ماہ کے آغاز میں اسکاٹ لینڈ سے شروع ہوئی اور بعد ازاں انگلینڈ کے پائن ووڈ اسٹوڈیوز منتقل ہو گئی۔ فلم میں پرانے کردار جیسے زندایا (ایم جے)، جیکب بٹالون (نیڈ لیڈز) اور مائیکل مانڈو (سکورپین) واپسی کریں گے، جبکہ نئے اداکاروں میں سیڈی سنک، لیزا کولون زایاس اور ٹرامیل ٹِل مین شامل ہیں۔ اطلاعات کے مطابق سیڈی سنک، پیٹر پارکر کی ایک ساتھی کا کردار ادا کریں گی۔
جیکی چین کی مشہور اسٹنٹ ٹیم کی موجودگی سے توقع کی جا رہی ہے کہ فلم میں مارشل آرٹس کے جوشیلے رنگ اور سپر ہیرو ایکشن کا شاندار امتزاج دیکھنے کو ملے گا، جو شائقین کے لیے مزید پرکشش ہوگا۔
