تیانجن، یکم ستمبر 2025:
چینی صدر شی جن پنگ نے شنگھائی تعاون تنظیم (ایس سی او) کے تحت ایک ترقیاتی بینک کے قیام کی تجویز پیش کی ہے اور کہا ہے کہ یہ قدم رکن ممالک کے درمیان اقتصادی تعاون کو مزید مستحکم کرنے کے لیے نہایت ضروری ہے۔
یہ تجویز تیانجن میں جاری ایس سی او کے سربراہانِ مملکت کے 25ویں اجلاس میں پیش کی گئی، جس میں وزیراعظم شہباز شریف بھی شریک ہیں۔
اپنے خطاب میں صدر شی نے کہا کہ ایس سی او آج ایک مضبوط اور گہرے جڑوں والا ادارہ بن چکا ہے، جو اعتماد اور باہمی مفاد کے اصولوں پر آگے بڑھ رہا ہے۔ ان کا کہنا تھا کہ اس فورم میں تجارت، ٹیکنالوجی اور معیشت سمیت کئی شعبوں میں تعاون بڑھانے کے وسیع مواقع موجود ہیں۔
صدر شی نے زور دیا کہ رکن ممالک کو صنعت و تجارت میں دستیاب مواقع سے فائدہ اٹھانا ہوگا۔ انہوں نے کہا کہ وسائل بڑھانے کے لیے صلاحیت میں اضافہ اور سائنس و ٹیکنالوجی کے شعبوں میں قریبی تعاون وقت کی اہم ضرورت ہے۔
چینی صدر کا کہنا تھا کہ ایس سی او کے مقاصد کو آگے بڑھانے کے لیے ایک ترقیاتی بینک کا قیام ناگزیر ہے، جو مالیاتی ڈھانچے کو مضبوط بنیاد فراہم کرے گا۔ “اس حوالے سے فوری فیصلوں اور مضبوط اداروں کے قیام کی ضرورت ہے،” انہوں نے کہا۔
انہوں نے مزید کہا کہ رکن ممالک کو تجارت اور رابطوں کو فروغ دینا ہوگا، اور چین خطے کی سماجی و اقتصادی ترقی میں اپنا کردار ادا کرنے کے لیے پرعزم ہے۔ ان کا کہنا تھا کہ عوامی خوشحالی اور ترقی کے لیے عملی اقدامات وقت کی ضرورت ہیں۔
شی جن پنگ نے روایتی سرحدی تجارت کے نظام کو دوبارہ فعال کرنے کی بھی تجویز دی اور کہا کہ دنیا کو ایسے کثیرالجہتی تجارتی ڈھانچوں کو مستحکم کرنا ہوگا جو مساوات پر مبنی ہوں۔ انہوں نے اقوامِ متحدہ کے چارٹر کا حوالہ دیتے ہوئے کہا کہ عالمی سطح پر ایسے نظام کو فروغ دینے کی ضرورت ہے جس میں تمام ممالک کو برابری کی بنیاد پر مواقع حاصل ہوں۔
“دنیا میں ایسا کثیرالجہتی نظام ہونا چاہیے جس سے ہر قوم برابر کا فائدہ اٹھا سکے،” صدر شی نے کہا اور زور دیا کہ عالمی حکمرانی کے نظام کو انصاف اور توازن کی بنیاد پر بہتر بنانا وقت کی اہم ضرورت ہے۔
