اسلام آباد – وزیراعظم شہباز شریف نے ترکیہ کے صوبہ ازمیر میں بھڑکتی ہوئی جنگلاتی آگ پر گہرے رنج و غم کا اظہار کرتے ہوئے ترک عوام اور صدر رجب طیب اردوان سے مکمل یکجہتی کا اظہار کیا ہے۔
سماجی رابطے کی ویب سائٹ ایکس (سابقہ ٹوئٹر) پر اپنے پیغام میں وزیراعظم نے ترک قوم کے لیے نیک تمناؤں کا اظہار کرتے ہوئے لکھا کہ وہ ازمیر میں تباہ کن آگ سے پیدا ہونے والی صورتحال پر نہایت افسردہ ہیں۔
"ہماری دعائیں اور نیک خواہشات ترکیہ کے بہادر اور ثابت قدم عوام کے ساتھ ہیں،” انہوں نے لکھا۔ "دعا ہے کہ آگ پر جلد قابو پا لیا جائے اور جانی و مالی نقصان کم سے کم ہو۔”
وزیراعظم نے اس موقع پر پاکستان اور ترکیہ کے برادرانہ تعلقات کا بھی اعادہ کیا، اور کہا کہ پاکستان ہر ممکن مدد فراہم کرنے کے لیے تیار ہے۔
"ترکیہ ہمیشہ ہر مشکل وقت میں پاکستان کے ساتھ کھڑا رہا ہے، آج ہم بھی ان کے ساتھ ہیں،” انہوں نے کہا۔
