کراچی، 15 نومبر 2025: میگا موٹر کمپنی (MMC)، جو پاکستان میں بی وائی ڈی کی آفیشل پارٹنر ہے، نے کراچی میراتھن 2026 کے ساتھ شراکت داری کا اعلان کیا ہے۔ یہ پاکستان کا پہلا عالمی معیار کا ورلڈ ایتھلیٹکس–سرٹیفائیڈ میراتھن ہے۔ اس شراکت داری کے تحت ایم ایم سی نہ صرف ایتھلیٹس کی سپورٹ کرے گی بلکہ ملک میں موبلٹی کے حوالے سے اقدامات اور پاکستان کی عالمی اسپورٹس میں موجودگی کو بھی مضبوط کرے گی۔
اس موقع پر سائننگ کی تقریب بی وائی ڈی پاکستان کے کراچی ایکسپیرینس سینٹر میں منعقد ہوئی، جس میں ایم ایم سی، بی وائی ڈی اور میراتھن آرگنائزنگ کمیٹی کے سینئر عہدیداران نے شرکت کی۔ کرکٹ کے لیجنڈ مصباح الحق بھی خصوصی مہمان کے طور پر موجود تھے، جو اس میراتھن کی لگن اور قومی فخر کی عکاسی کرتے ہیں۔
اس شراکت داری کے تحت بی وائی ڈی SHARK 6 کو آفیشل "ٹائمر کار” کے طور پر استعمال کیا جائے گا، جو رنرز کو اسٹارٹ لائن سے لے کر آگے کی رہنمائی کرے گی اور بی وائی ڈی کی جدت، درستگی اور اسمارٹ موبلٹی کے عزم کو ظاہر کرے گی۔ یہ میراتھن، جو پاکستان کی سب سے بڑی بین الاقوامی روڈ ریس ہے، ہزاروں مقامی اور بین الاقوامی ایتھلیٹس کو متوجہ کرے گا اور وژن 2032 کے اہداف سے مطابقت رکھتا ہے، جس کا مقصد پاکستانی رنرز کو عالمی میراتھنز اور آخرکار اولمپکس کے لیے اہل بنانا ہے۔
تقریب سے خطاب کرتے ہوئے، ایم ایم سی کے نائب صدر سیلز و اسٹریٹیجی، دانش خالق نے کہا کہ کمپنی کا وژن صرف موبلٹی تک محدود نہیں بلکہ مضبوط اور پائیدار کمیونٹیز کی تشکیل پر بھی مرکوز ہے۔ ایم ایم سی دو بہترین پاکستانی میراتھن ایتھلیٹس کو بین الاقوامی مقابلوں میں شرکت کے لیے اسپانسر کرے گی، جو صحت، کارکردگی اور کھیلوں کی ترقی کے عزم کی نمائندگی کرتا ہے۔
بی وائی ڈی پاکستان کے کنٹری منیجر، لی جیان نے کہا کہ یہ میراتھن صبر، اتحاد اور مثبت توانائی کی عکاسی کرتا ہے، جو بی وائی ڈی کے مشن کے مطابق ہیں، جس کا مقصد پائیدار اور صحت مند کمیونٹیز کو فروغ دینا ہے۔ ایم ایم سی اور بی وائی ڈی میراتھن ٹیم کے ساتھ مل کر آگاہی مہمات اور پروموشنل سرگرمیوں میں کام کریں گے تاکہ 2026 کی ریس تک ملک میں اسپورٹس اور مقامی ٹیلنٹ کو فروغ دیا جا سکے۔
