اسلام آباد – 20 ستمبر 2025: فیڈرل بورڈ آف ریونیو (ایف بی آر) نے سوشل میڈیا پر عیاشیوں اور شاہانہ طرزِ زندگی کی نمائش کرنے والوں کا ریکارڈ اکٹھا کرنا شروع کر دیا ہے، جس کے بعد ٹیکس چوری کے خلاف بڑے پیمانے پر کارروائی کا آغاز ہونے جا رہا ہے۔
ذرائع کے مطابق ایف بی آر نے ایک لاکھ سے زائد ایسے افراد کا ڈیٹا حاصل کر لیا ہے جو سوشل میڈیا پر اپنی دولت کی نمائش کرتے ہیں مگر انکم ٹیکس ریٹرن جمع نہیں کرواتے۔ یکم اکتوبر سے ایسے افراد کے خلاف کارروائیاں شروع کر دی جائیں گی۔
یہ مہم لائف اسٹائل مانیٹرنگ ٹیموں اور نادرا کی مدد سے چلائی جا رہی ہے، جس کے تحت مشکوک نان فائلرز کی جامع فہرستیں تیار کر لی گئی ہیں۔ حکام کے مطابق ان افراد پر خاص نظر رکھی جائے گی جو مہنگی گاڑیوں، موٹر سائیکلوں، یاٹ، بنگلوں، فلیٹس، فارم ہاؤسز، برانڈڈ کپڑوں، قیمتی زیورات اور گھڑیوں کی نمائش کرتے ہیں۔
ایک ایف بی آر اہلکار نے بتایا کہ “جو لوگ شادیوں پر لاکھوں روپے اڑا رہے ہیں، بیس ہزار ڈالر کے سوٹ پہن رہے ہیں اور اپنی آمدنی سے کہیں زیادہ شاہانہ زندگی دکھا رہے ہیں، اب ان پر سخت نظر رکھی جائے گی۔” حکام نے اس بات کی بھی تصدیق کی ہے کہ شادیوں کے اخراجات، لگژری سفر اور غیر ملکی کریڈٹ کارڈز کے استعمال کا ریکارڈ جمع کر کے ان کے ٹیکس ریٹرنز سے موازنہ کیا گیا ہے۔
یہ اقدام ایف بی آر کے اس عزم کو ظاہر کرتا ہے کہ وہ ٹیکس نیٹ کو وسیع کرے اور دولت مند مگر نان فائلرز کو قانون کے دائرے میں لائے۔ حکام نے واضح کر دیا ہے کہ انکم ٹیکس ریٹرن جمع کروانے کی آخری تاریخ 30 ستمبر ہے اور اس میں کسی قسم کی توسیع نہیں کی جائے گی۔
