کراچی، 31 اکتوبر 2025: ایزی پیسہ ڈیجیٹل بینک نے مالی سال 2025 کے پہلے نو ماہ کے نتائج جاری کرتے ہوئے شاندار کارکردگی کا مظاہرہ کیا ہے۔ بینک نے 30 ستمبر 2025 کو ختم ہونے والی مدت کے دوران ٹیکس سے قبل 5.65 ارب روپے کا منافع کمایا، جو گزشتہ سال کے اسی عرصے میں حاصل ہونے والے 3.88 ارب روپے کے مقابلے میں 45.6 فیصد اضافہ ظاہر کرتا ہے۔
بینک کی مضبوط کارکردگی کی بنیادی وجوہات میں جمع پونجی میں نمایاں اضافہ، ڈیجیٹل پیمنٹ سروسز سے حاصل ہونے والی فیس کی آمدنی میں اضافہ، اور اخراجات پر مؤثر کنٹرول شامل ہیں، جنہوں نے مجموعی منافع کو مزید مستحکم کیا۔
نیٹ مارک اپ آمدنی میں 8.46 فیصد اضافہ ریکارڈ کیا گیا، جو ڈیجیٹل قرضہ جات کے پھیلاؤ اور کم لاگت ڈپازٹس کے تسلسل کی بدولت ممکن ہوا۔ اس کے برعکس نان مارک اپ آمدنی میں 44.6 فیصد اضافہ ہوا، جو آن لائن ادائیگیوں، بنڈل پروڈکٹس، ڈسبرسمنٹ اور کلیکشن کمیشن، اور انشورنس مصنوعات سے بڑھتی ہوئی ٹرانزیکشنز کے باعث ممکن ہوا۔
آپریٹنگ اخراجات میں صرف 5.9 فیصد اضافہ ہوا، کیونکہ بینک نے ٹیکنالوجی، افرادی قوت اور نئے صارفین کے حصول میں سرمایہ کاری جاری رکھی تاکہ طویل المدتی ترقی کو یقینی بنایا جا سکے۔ ان سرمایہ کاریوں کے باوجود، بینک کا کاسٹ ٹو انکم ریشو بہتر ہو کر 69.9 فیصد پر آگیا، جو گزشتہ سال کے 80.3 فیصد کے مقابلے میں نمایاں بہتری کو ظاہر کرتا ہے۔
صارفین کی جمع پونجی 109.6 ارب روپے تک پہنچ گئی، جو ستمبر 2024 کے مقابلے میں 61.9 فیصد اضافہ ظاہر کرتی ہے۔ یہ اضافہ صارفین کے بڑھتے ہوئے اعتماد کی علامت ہے، خاص طور پر بینک کے مکمل طور پر ڈیجیٹل ریٹیل بینک میں تبدیلی کے بعد۔ کل قرضہ جات 26.14 ارب روپے ریکارڈ کیے گئے، جبکہ لون ٹو ڈپازٹ ریشو 21.5 فیصد رہا۔
ایزی پیسہ کا سرمایہ (Equity) 18.35 ارب روپے رہا، جبکہ کیپیٹل ایڈی کوئسی ریشو (CAR) 23.16 فیصد پر برقرار رہا، جو ریگولیٹری تقاضوں سے کہیں زیادہ ہے۔
ایزی پیسہ ڈیجیٹل بینک کے صدر و سی ای او جہانزیب خان نے نتائج پر تبصرہ کرتے ہوئے کہا:
“ہم اپنی ترقی کے سفر کو مضبوط اعتماد اور مسلسل کارکردگی کے ذریعے آگے بڑھا رہے ہیں۔ میں اپنے شیئر ہولڈرز، صارفین، اور اسٹیٹ بینک آف پاکستان کا شکریہ ادا کرنا چاہتا ہوں جنہوں نے ملک میں ڈیجیٹل مالیاتی خدمات کو عام کرنے کے ہمارے مشن میں ہمارا ساتھ دیا۔ ایک مضبوط بنیاد کے ساتھ، ایزی پیسہ تیزی سے ہر پاکستانی کا پسندیدہ ڈیجیٹل بینک بننے کی جانب گامزن ہے۔”
ایزی پیسہ کے چیف فنانشل آفیسر امین سخیانی نے کہا کہ 45 فیصد منافع میں اضافہ بینک کی کامیاب حکمتِ عملی اور انتظامی ٹیم کی محنت کا نتیجہ ہے۔
“ہم نے بنیادی بینکنگ سرگرمیوں پر توجہ مرکوز رکھی، جس سے شاندار نتائج حاصل ہوئے۔ اگلے سال نئے مالیاتی مصنوعات کے اجرا اور مالی خواندگی کے فروغ کے ذریعے ہم صارفین کے اعتماد کو مزید مضبوط بنانے اور اپنی مارکیٹ پوزیشن کو وسعت دینے کے لیے پُرعزم ہیں،” انہوں نے کہا۔
55 ملین سے زائد رجسٹرڈ صارفین کے ساتھ، ایزی پیسہ جو پاکستان کا پہلا مکمل ڈیجیٹل بینک ہے اسٹیٹ بینک آف پاکستان کے مالی شمولیت اور پائیدار معاشی ترقی کے وژن کے مطابق اپنی کاوشیں جاری رکھے ہوئے ہے۔
بینک نے اس عزم کا اعادہ کیا ہے کہ وہ نہ صرف اپنے موجودہ صارفین بلکہ ان لاکھوں افراد کے لیے بھی جدید مالیاتی سہولیات فراہم کرتا رہے گا جو اب بھی غیر بینک شدہ یا جزوی طور پر بینک شدہ ہیں۔
