کراچی — آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے سندھ کے ضلع خیرپور میں ایک اہم دریافت کا اعلان کیا ہے، جہاں بٹرسِم ایسٹ۔1 ایکسپلوریشن ویل سے گیس اور کنڈینسیٹ کے ذخائر ملے ہیں۔
ریاستی ملکیتی توانائی کمپنی، جو بٹرسِم ایکسپلوریشن لائسنس میں 95 فیصد ورکنگ انٹرسٹ رکھتی ہے، نے یہ کامیابی گورنمنٹ ہولڈنگز (پرائیویٹ) لمیٹڈ (جی ایچ پی ایل) کے اشتراک سے حاصل کی ہے جس کا حصہ 5 فیصد ہے۔
تفصیلات کے مطابق، بٹرسِم ایسٹ۔1 کنویں کی ڈرلنگ 30 جون 2025 کو شروع ہوئی تھی اور اسے 3,800 میٹر گہرائی تک کھودا گیا، جس کا ہدف سیمبر فارمیشن تھا۔ یہ کام او جی ڈی سی ایل کی اپنی تکنیکی مہارت اور شراکت دار ادارے کے تعاون سے مکمل کیا گیا۔
کمپنی کے مطابق، لوئر گورو فارمیشن کی "میسیو” اور "بیسل سینڈز” میں دو ڈرل اسٹیم ٹیسٹ (DSTs) کیے گئے، جن کے نتائج نہایت حوصلہ افزا رہے۔ کنویں نے مشترکہ طور پر یومیہ 22.5 ملین مکعب فٹ گیس اور 690 بیرل کنڈینسیٹ پیدا کرنے کی صلاحیت ظاہر کی، جو 32/64 انچ چوکے پر حاصل کی گئی۔
حکام کا کہنا ہے کہ یہ دریافت نہ صرف او جی ڈی سی ایل کے وسائل میں اضافہ کرے گی بلکہ ملکی سطح پر توانائی کے ذخائر میں بھی ایک اہم اضافہ ہے، جو بڑھتی ہوئی طلب کے تناظر میں توانائی کے تحفظ کو مضبوط بنائے گا۔
کمپنی کے اعلامیے میں کہا گیا ہے کہ:
“بٹرسِم ایسٹ۔1 کے کامیاب نتائج او جی ڈی سی ایل کے وسائل کو وسعت دینے کے ساتھ ساتھ مقامی پیداوار کے ذریعے توانائی کی طلب و رسد کے فرق کو کم کرنے میں بھی اہم کردار ادا کریں گے۔”
یہ دریافت او جی ڈی سی ایل کی حالیہ کامیابیوں کے تسلسل کا حصہ ہے، جو پاکستان کے تیل و گیس کے شعبے میں سب سے بڑے شراکت دار کے طور پر اپنی اہمیت کو مزید مستحکم کر رہی ہے۔
