اسلام آباد/نیو یارک – اقوام متحدہ نے بھارت کے حالیہ بیانات پر تشویش کا اظہار کرتے ہوئے زور دیا ہے کہ قدرتی وسائل، خصوصاً پانی، صرف باہمی معاہدوں کے تحت ہی تقسیم کیے جانے چاہئیں۔ یہ بیان اُس وقت سامنے آیا جب بھارتی وزیر داخلہ امیت شاہ نے انڈس واٹر ٹریٹی (IWT) کو بحال نہ کرنے کا دو ٹوک اعلان کیا۔
امیت شاہ نے "ٹائمز آف انڈیا” کو دیے گئے انٹرویو میں کہا کہ بھارت سندھ طاس معاہدے کو مکمل طور پر ختم کر دے گا اور وہ پانی جو پاکستان کی طرف جاتا ہے، اب راجستھان منتقل کیا جائے گا۔ انہوں نے صاف کہا: "نہیں، یہ معاہدہ کبھی بحال نہیں ہوگا۔”
اس بیان پر ردعمل دیتے ہوئے اقوام متحدہ کے ترجمان اسٹیفان دوجارک نے نیویارک میں روزمرہ بریفنگ کے دوران کہا:
"میں نے یہ مخصوص بیان نہیں دیکھا، لیکن اصولی طور پر قدرتی وسائل کی تقسیم صرف باہمی طور پر تسلیم شدہ معاہدوں کے تحت ہی ہونی چاہیے۔”
یاد رہے کہ سندھ طاس معاہدہ پاکستان کے لیے زرعی پانی کا اہم ذریعہ ہے، جو بھارت سے نکلنے والے تین بڑے دریاؤں کے ذریعے پاکستان کے 80 فیصد کھیتوں کو سیراب کرتا ہے۔ حالیہ کشیدگی کے باوجود، یہ معاہدہ طویل عرصے تک امن کا ایک ذریعہ رہا ہے، خاص طور پر اس وقت جب امریکی صدر ڈونلڈ ٹرمپ کی ثالثی سے دونوں ممالک کے درمیان حالیہ برسوں کی بدترین جھڑپوں کے بعد جنگ بندی ہوئی تھی۔
پاکستان نے امیت شاہ کے بیان کو بین الاقوامی قانون کی صریح خلاف ورزی قرار دیا ہے۔ دفتر خارجہ کے ترجمان شفقات علی خان نے کہا:
"یہ بیان بین الاقوامی معاہدوں کی حرمت کی کھلی تذلیل ہے۔”
پیر کو قومی اسمبلی سے خطاب کرتے ہوئے پاکستان پیپلز پارٹی کے چیئرمین بلاول بھٹو زرداری نے، جنہوں نے عالمی سطح پر پاکستان کا مؤقف اجاگر کرنے میں کلیدی کردار ادا کیا، بھارتی مؤقف کو غیر قانونی قرار دیا۔ ان کا کہنا تھا:
"پاکستان کا پانی روکنے کی دھمکی اقوام متحدہ کے چارٹر کی خلاف ورزی ہے۔ اگر بھارت نے اس اقدام پر عمل کیا، تو پاکستان ایک اور جنگ لڑنے پر مجبور ہوگا۔”
انہوں نے مزید کہا کہ پاکستان کی فضائیہ ماضی میں بھی بھارت کو شکست دے چکی ہے اور اگر ضرورت پڑی تو دوبارہ دے گی۔
